टाइगर प्यालेस रिसोर्टमा प्रहरीको आँखा, राष्ट्र बैंकको मौनता  

पर्यटनमा वैदेशिक लगानी भनेर भित्रिएको ३ अर्ब रुपैयाँ र नेपाली बैंक तथा बित्तिय संस्थाको साढे दुई अर्ब रुपैयाँ यतिबेला जोखिममा छ । पछिल्लो समय बन्दजस्तै रहेको रिसोर्टबाट अत्याधुनिक उपकरण जडान गरेर अनलाईन जुवा खेलाउने गरेको उजुरी प्रहरी महानिरीक्षक शैलेश थापा क्षेत्रीसम्म पुगेपछि प्रहरी अनुसन्धानमा जुुटेको छ । सरकारी जग्गा मिचेको, सम्पत्ति रोक्का भएको र बैंकिङ कसुरको उजुरी परेको रिसोर्टका हर्ताकर्ता प्रमुख कार्यकारी अधिकृत माइक लुइक डेनियुभ बोल्सोभ  र आधिकारीक प्रतिनिधि एमी बनेल देशका कुटनीतिज्ञ र सरकारी अधिकारी भेटिरहेका छन् । 

१४ फागुन २०७७ मा रुपन्देहीको तिलोत्तमा नगरपालिकास्थित टाइगर प्यालेस रिर्सोट तथा सोही रिर्सोटको परिसरमा रहेको टाइगर वन क्यासिनोको आधिकारी ट्रेड युनियनकाे प्रतिनिधित्व सहितले नेपाल राष्ट्र बैंकमा गर्भनर महाप्रसाद अधिकारीलाई सम्बोधनगर्दै एउटा उजुरी दियाे । 

यसअघि पटक–पटक अनेकन विवादमा मुछिदैं आएको रिर्सोटले विभिन्न बैंक तथा वित्तिय संस्थाहरुबाट लिएको ऋण दुरुपयोग गरेको फेहरिस्त उजुरीमा थियो । उजुरी नेपाल राष्ट्र बैंकले दर्ता समेत गरेको थियो । तर, कुनै कारबाही अघि बढेन् । 

पर्दाफासले बुधबार राष्ट्र बैंकका प्रवक्ता देवकुमार ढकाललाई सम्पर्कगर्दा उनले उजुरीका बिषयमा अनभिज्ञता ब्यक्त गरे । उनले टाइगर प्यालेस रिर्सोटका बिषयमा कुनै उजुरी नआएको दाबी समेत गरे । उनले भने, ‘त्यस्तो केही उजुरी आएको जानकारी मलाई छैन, केही रहेछ भने म हेरौला ।’ 

राष्ट्र बैंकमा परेको उजुरीमा प्राइम कमर्सियल बैंकले लगानी गरेको १३ करोड रूपैयाँभन्दा बढी रकम रिसोर्टले दुरूपयोग गरेको उल्लेख छ ।  रिसोर्टमा नेपाल इन्भेस्टमेन्ट, सिभिल र सानिमा बैंकको समेत करिब १६९ करोड रुपैयाँ लगानी रहेको छ ।  सिल्भर हेरिटेजले रिसोर्ट र एसएमएसके क्यासिनो सञ्चालन गरिरहेको छ । कर्जा लिएको रकममध्ये केही रिसोर्टमा र केही क्यासिनोमा लगानी भएपछि कर्मचारीले विरोध गरेका हुन् । हाल क्यासिनो रिर्सोट दुबै बन्द छ भने त्यहाँ कार्यरत कर्मचारी आन्दोलनमा छन् । 

एकजना मजदुरले दिएको यो उजुरी बैंकिङ कसुरसँग सम्बन्धित थियो । आधिकारिक लेखापरिक्षणमा उजुरीमा भनिए जस्तै रिसोर्टको आर्थिक कारोबार राष्ट्र बैंकको ‘नोटिस’ मा आउनैपर्ने बिषय थियो । पीकेएफ टिआर उपाध्याय एण्ड कम्पनीले सिल्भर हेरिटेज इन्भेष्टमेन्ट प्रालि ( दर्ता नम्बर १११३८२ दर्ता मिति २६ चैत्र २०६९) र टाइगर वनको स्वतन्त्र लेखापरिक्षण गरेको थियो । (हेरौं तस्बिर) 

प्रहरी निगरानीमा रिसोर्ट 

जिल्ला प्रहरी कार्यालयमा केही दिनअघि क्यासिनो किङको उपमा पाएका विवादास्पद नवधनाढ्य र प्रहरीको नोटिसमा रहिरहने बलराम सापकोटा बले टाइगर प्यालेसमा आएको सूचना आउछ । सापकोटाको त्यो भ्रमण उनले संचालनको तयारी गरिरहेको झापाको होटलका लागि टाईगर वन क्यासिनोका सामाग्री खरिद गर्ने बिषयमा थियो । 

त्यसको केही दिनपछि प्रहरी महानिरीक्षक शैलेश थापा क्षेत्रीलाई रिसोर्टका बिषयमा जानकार एउटा समूहले रिसोर्टमा भइरहेको अर्को डरलाग्दो गतिविधिको सूचना दिए । महानिरीक्षक थापा क्षेत्रीले यो बिषय प्रदेश प्रहरी प्रमुख डीआईजी रविन्द्रसिंह धानुकलाई गराए । 

यतिबेला जिल्ला प्रहरी कार्यालय रुपन्देहीको टोली अनुसन्धानमा जुटेको छ । 

‘केही सूचनाहरु आएका थिए,’ डीआईजी धानुकले भने, ‘हाम्रो जिल्लाको टिमले काम गरिरहेको छ ।’ उनले त्यो बिषय खुलाउन चाहेन्न् । 

स्रोतका अनुसार रिसोर्टले आधुनिक उपकरणसहित बन्द रहेको भवनभित्रको गोप्य कोठाबाट अनलाईन जुवा खेलाइरहेको हो । उसले विश्वभर छरिएको आफ्नो सञ्जालमा यो जुवा खेलाउने र त्यो रकम बीबीआई हङकङमा जम्मा भइरहेको हो । यसको भिडियो नै बाहिरिएपछि प्रहरीले निगरानी बढाएको हो । 

‘सेना मार्फत प्रहरीका चिफसम्म यो बिषय पुगेको हो,’ स्रोतले भन्यो, ‘आर्थिक र फौजदारी अपराध समेत भेटिएको छ ।’ 

आरोपै आरोपको दलदलमा टाईगर वन 

नेपालका बैंक तथा वित्तिय संस्थाको करिब १ सय ६९ करोडभन्दा बढि रकम जोखिममा पर्दासमेत नेपाल राष्ट्र बैंक मौन बसेको छ । गर्भनर महाप्रसाद अधिकारी नै यो बिषयमा जानकार हुँदाहुँदै उनको मौनता यतिबेला सन्देहपूर्ण बनेको छ ।  

स्थापनाकालमै राष्ट्र बैंकले नै सिल्भर हेरिटेजमा आएको रकम रोकेपछि कम्पनीको ‘खाता’ राष्ट्र बैंकमा खुलेको थियो । अस्ट्रेलियाली कम्पनीको व्यवस्थापनमा २ अर्ब ५० करोड नेपाली पुँजी सिञ्चित रिसोर्टको सेयर र अचल कित्ता नम्बरहरू यतिबेला  रोक्का छन् ।

राष्ट्र बैंकको बैंक सुपरीवेक्षण विभाग विशेष निरीक्षण इकाईका उपनिर्देशक पिताम्बर पोखरेलले २८ असोजमा प्राइम कमर्सियल बैंक लिमिटेडका नाममा पत्राचार गरेका थिए । त्यसपछिको कारबाही एकाएक रोकिएको छ । 

स्रोतका अनुसार यतिबेला रिसोर्टका प्रमुख कार्यकारी अधिकृत माइक लुइक डेनियुुभ बोल्सोभ  र आधिकारीक प्रतिनिधि एमी बनेल रिसोर्टको दौडधुुप र भेटघाटको प्रभाव यतिबेला उनीहरुमाथिको कारबाही रोक्ने अस्त्र बनेको छ । 

सिल्भर हेरिटेजले ७ करोडभन्दा बढीको विदेशी मुद्रा साटेर यतिबेला विभिन्न माध्यमबाट बाहिर पठाएको अर्को आरोपमा राष्ट्र बैंक र सम्पत्ति शुद्धीकरण अनुसन्धान विभागको अनुसन्धानमा छ ।  

पर्यटक भिसा र ग्य्राटिस भिसाका विदेशी नागरिकलाई काममा लगाएको, राजस्व र विनफल गेन ट्याक्स (आकस्मिक लाभकर), कर्मचारी बोनस नतिरेको आरोप पनि सिल्भर हेरिटेजमाथि छन् । यस्तै विदेशी कर्मचारीहरुलाई उच्च तहको तलब र सुविधा दिएर त्यो रकम नेपालमा नभई विदेशमै भुक्तानी गरेको जस्ता आरोपमाथि समेत अनुसन्धान भइरहेको छ ।