आर्थिक संकट आउन नदिन निर्यात उद्योगलाई प्रोत्साहन गर्नुपर्छः पवन गोल्यान 

फेडरेशन अफ नेपाल एक्सपोर्ट एशोशिएशनका अध्यक्ष पवनकुमार गोल्यानले सरकारले विदेशी मुद्रा आर्जनको लागि निर्यातजन्य उद्योगलाई प्रोत्साहन गर्नुपर्ने बताएका छन् ।

आयात बढ्दै जाँदा विदेशी मुद्रा सञ्चितिमा परेको दबाब कम गर्न निर्यातजन्य उद्योगलाई सरकारले प्रोत्साहन गर्नुपर्ने गोल्यानले बताए । उनले सरकारले निर्यातजन्य उद्योगमा लगानी गर्ने र उद्योगबाट उत्पादित वस्तु विदेश निर्यातको वातावरण बनाउनु आवश्यक रहेको बताएका हुन् । 

उनले सरकारले निर्यात गर्नेभन्दा पनि आयात गर्ने व्यवसायीलाई प्रोत्साहन गरिरहेको गुनासो गरे ।

उनले भने, ‘हामी ४ रुपैयाँ (प्रतियुनिट)  विद्युत बेच्न तयारी गरिरहेका छौं । भारतलाई हारगुहार गर्नुभन्दा त्यही दरमा नेपाली उद्योगलाई दिए हुन्छ नि ? अहिले हामी साढे ९ रुपैयाँ तिरिरहेका छौं ।’ 

यस्तोमा प्रतियुनिटमा आधा शुल्क घटाउने हो भने त्यो विद्युत् स्वेदशमै खपत गर्न सकिने गोल्यानले बताए । यद्यपि त्यसको लागि निर्यातलाई बढावा दिने किसिमका शर्त राख्न सकिने उनको भनाइ छ ।

 उनले भने, ‘यसमा तीनओटा शर्त राखौं ।  जसमा न्यूनतम ६० प्रतिशत निर्यात गरेको, ८० प्रतिशत नेपाली कामदार हुनुपर्‍यो र भ्यालु एडिसन ३० प्रतिशत हुनपर्‍यो । त्यसपछि उद्योग फस्टाइ हाल्छ । धागो उद्योग कै निर्यात हेरौ । अहिले ११ अर्बको निर्यात हुन्छ भने सरकारले सहुलियत दिए २२ अर्ब हुन्छ ।’ 

उनले सहुलियतपूर्ण ऋणको दायरा पनि बढाउँदै निर्यातजन्य उद्योगलाई बढावा दिनुपर्नेमा गोल्यानले जोड दिए ।

सरकारले अहिले राजस्वमा बढी ध्यान केन्द्रित गरेको भन्दै राजस्वभन्दा पनि  युवाहरुलाई विदेशिनबाट रोक्ने किसिमको योजना ल्याउनु जरुरी रहेको बताए । 

गोल्यानले नेपालमा उत्पादित वस्तु विदेश निर्यातको लागि अनुमति मागेको वर्षौंसम्म पनि अनुमति नपाएको गुनासो गरे ।