जोगवनी नाकाबाट नगद र सुनसहित भारतीय नागरिक पक्राउ

पर्दाफास रिपोर्टर
कार्तिक २२, २०७७

हुण्डीको नगद र तस्करीको सुनको गहनासहित एक जना भारतीय नागरिकलाई सशस्त्र प्रहरीले नियन्त्रणमा लिएको छ ।

भारतबाट तस्करी गरेर नेपालतर्फ ल्याउदै गरेको साढे २४ तोला सुनको गहना र हुण्डीको अवैध ६ लाख ६२ हजार रुपैयासहित सशस्त्र प्रहरी बोर्डर आउट पोस्ट रानीले भारतीय नागरिक दीपक कुमार भगतलाई मोरङको सलामपुरबाट नियन्त्रणमा लिएको हो ।

सशस्त्र प्रहरी बीओपी रानीका प्रमुख इन्स्पेक्टर मौसम पोखरेलको नेतृत्वमा खटिएको टोलीले भगतको साथबाट २८९.४४० ग्राम सुनको गहना बरामद गरेको सशस्त्र प्रहरी बल मोरङका प्रमुख एसपी तीर्थ पौडेलले जानकारी दिए ।

उनले भगतको साथबाट लकेट ३७ थान, हातमा लगाउने ब्रास्लेट ४ थान, झुम्का १० थान, चुरा २ थान र मोवाइल एक थान बरामद गरेको बताए ।

गत चैत महिनादेखि जोगवनी नाका ठप्प छ, तर यो नाकामा तस्करहरु सक्रिय रहेका छन् । खुल्ला सिमाना भएको मोरङमा दैनिक जसो खाद्यन्नका सामान र लत्ताकपडाहरु तस्करी गरेको सामानहरु बरामद हुने गरेको सशस्त्र प्रहरीले जनाएको छ ।