सशस्त्र प्रहरीद्वारा भन्सार छलेर ल्याइएको ४३ लाखभन्दा बढीको सामान बरामद, एक पक्राउ

सशस्त्र प्रहरीले भारतबाट भन्सार छलेर नेपाल ल्याइएका ४३ लाखभन्दा बढी मूल्यको सामग्री बरामद गरेको जनाएकाे छ ।

सशस्त्र प्रहरीका अनुसार तीन छुट्टाछुट्टै घटनामा गरी उक्त सामग्री बरामद गरिएको हो भने एकजना मानिस पनि पक्राउ परेका छन् ।

शुक्रबार वीरगञ्ज महानगरपालिका–१५ पूर्व–पश्चिम लोकमार्गबाट सशस्त्र प्रहरीले करिब २८ लाख ४२ हजार रुपैयाँ बराबरको ईलेक्ट्रोनिक, हार्डवयर तथा अन्य सामान बरामद गरेको छ ।

ट्रकमा राखी भन्सार छलेर नेपाल ल्याइँदै गरेको अवस्थामा प्रहरीले उक्त सामानसहित करिब २५ लाख रुपैयाँको ट्रक पनि बरामद गरेको छ । 

त्यस्तै पश्चिम नवलपरासी जिल्लाको पाल्हिनन्दन गाउँपालिका-२ मुडेरस्थित दुई घरको खाली जमिनमा त्रिपालले छोपी लुकाई छिपाई राखेको ९ लाख ३१ हजार रुपैयाँ बराबरको लत्ताकपडा बरामद गरिएको छ । बरामद लत्ताकपडा भन्सार कार्यालय महेशपुरमा बुझाइको छ । 

बिहीबार प्रहरीले झापाको दमक नगरपालिका-५ पूर्व–पश्चिम लोकमार्गस्थित दमक बजारबाट करिब ६ लाख रुपैयाँ बराबरको चोरीपैठारीको ४५ बोरा चिनीसहित एकजनालाई पक्राउ गरेको छ ।

उनको साथबाट म्याजिक भ्यान पनि बरामद गरिएको छ ।