कोभिडले लियो सशस्त्र प्रहरी निरीक्षक बुढाथोकीको ज्यान 

सशस्त्र प्रहरी निरीक्षक  नवीन बुढाथोकीको कोभिड–१९ संक्रमणका कारण सोमबार राती निधन भएको छ ।

कोभिड–१९ संक्रमणपछि भेन्टिलेटरमा राखेर बिराटनगरस्थित बिराट मेडिकल कलेजमा उपचार गराइरहेका उनको सोमबार राती सवा ११ बजे मृत्यु भएको हो । 

सशस्त्र प्रहरीमा २०६७ चैत्रमा सेवा प्रवेश गरेका नवीनको सशस्त्र प्रहरी ३ नम्बर गण मोरङमा दरबन्दी थियो । त्यही कार्यरत रहँदा उनमा २७ असोजमा संक्रमण पुष्टि भएको थियो । 

तेह्थुमको म्याग्लुङ नगरपालिका–१ स्थायी ठेगाना भएका नवीन फौजमा इमन्दार, मिलसार र मेहनती प्रहरी अधिकारीका रुपमा परिचित थिए । 

सशस्त्र प्रहरी प्रवक्ता डीआइजी राजु अर्यालले मृत्तक बुढाथोकीका आजै दाहसंस्कार गरिने बताए । बुढाथोकी अविवाहित थिए । 

उनका अनुसार हालसम्म सशस्त्र प्रहरीका तीनजना अधिकृत तथा जवानको डिउटीकाक्रममा संक्रमणबाट मृत्यु भइसकेको छ ।