एमसीसीबारे निर्णय लिन नेपाल आफैं सक्षम : प्रकाशशरण महत

नेपाली कांग्रेसका प्रवक्ता डा. प्रकाशशरण महतले एमसीसी सम्झौंता संसदबाट पारित गराउन अमेरिकाले दबाब नदिएको स्पष्ट पारेका छन् ।

प्रवक्ता महतले एमसीसी सम्झौता संसदबाट पारित गराउन सरकारलाई कुनै पनि प्रकारको दबाब नआएको बताए । सोमबार काठमाडौंमा आयोजित पत्रकार भेटघाट कार्यक्रममा बोल्दै उनले अमेरिकी सरकारले सम्झौताको छिनोफानो गरिदिन भने नेपाल सरकारलाई आग्रह गरेको बताए ।

प्रवक्ता महतले एमसीसी सम्झौताबारे आवश्यक निर्णय लिन नेपाल आफैं सक्षम रहेको दाबी समेत गरे । उनले नेपालको स्वार्थ र हित अनुकूल हुने कुनै पनि प्रकारको प्रस्ताव स्वीकार गर्न नेपाल सरकार तयार रहेको पनि बताए । प्रवक्ता महतले एमसीसी नेपालको हितमा रहेको उल्लेख गर्दै संसदबाट पारित हुने विश्वास व्यक्त गरे । 

‘कसलाई दबाब परेको छ । उहाँहरुले जवाफ दिनुहोला । दवाव कसले महसुस गर्नु भयो । जहाँसम्म नेपाली कांंग्रेस पार्टी र नेपाली कांग्रेस नेतृत्वको सरकारको प्रश्न छ । हामीले यसलाई दवावको रुपमा लिएका छैनौं । यसको छिनोफानो गर्दिनुस् भन्ने अमेरिकी सरकारको भनाई हो । र, हामीले छिनोफानो गर्नुपर्छ । हामी आफैं यो निर्णय गर्न सक्छौं । यो हामी कसैले दवाव दिएर हामीले निर्णय गर्नेरुपमा यसलाई लिएका छैनौं । र, दवाव पनिआएको छैन् यस सम्बन्धलाई लिएर’ उनले भने ।

प्रवक्ता महतले चीनसँग सम्झौता गरिएको विआरआई परियोजना विस्तृत अध्ययन गरेर अघि बढाउने प्रतिबद्धता समेत व्यक्त गरे । सो अवसरमा उनले चीन सरकारले प्रस्ताव गरेको सो परियोजना आफू परराष्ट्रमन्त्री हुँदा स्वीकार गरेको स्मरण पनि गराए ।

‘कुनै पनि कुनै पनि सहमति कुनै पनि मित्र राष्ट्रहरुबाट वा बहुपक्षीय संस्थाहरुबाट हुने सहयोग हामी स्विकार गर्छौं । विआरआई सम्झौंता धेरै अध्ययनपछि, धेरै छलफलपछि धेरै परिमार्जन गरेर मैले नै सही गरेको हो । म आफैं विदेशमन्त्री हुँदा । त्यसो हुनाले त्यो सिद्धान्त र फ्रेमभित्र रहेर आउने विआरआई सहयोगलाई हामी सदैव वेलकम गर्छौ । अव कुन प्रोजक्ट लागू गर्नेभन्ने कुरा नेपालकै हो । बिआरआई पनि यसले दिने आर्थिक प्रतिफललगायतको विस्तृत अध्ययन गरेर अघि बढाउनेछौं’ उनले भने ।

प्रवक्ता महतले राष्ट्रको हितमा हुने कुनै पनि प्रकारको सम्झौता स्वीकार गरेर नेपाल सरकार अघि बढ्ने पटकपटक दोहो¥याए ।