कांग्रेसलाई कसैको बैशाखी लिएर जानुपर्ने आवश्यकता छैनः शेखर कोइराला

न्यूज एजेन्सी नेपाल
ब‌ैशाख ७, २०७९

नेपाली कांग्रेसका नेता शेखर कोइरालाले आफ्नो पार्टीलाई कसैको बैशाखी लिएर अघि बढ्नुपर्ने आवश्यकता नभएको बताएका छन् ।

पार्टीले आगामी स्थानीय निर्वाचनमा सत्तारुढ अन्य दलहरुसँग गठबन्धन गरेर निर्वाचनमा जाने निर्णय गरेकोप्रति इंकित गर्दै उनले यस्तो बताएका हुन् ।

बुधवार नेपाल विद्यार्थी संघ उपत्यकाका क्याम्पस इकाइहरुको संयुक्त आयोजनामा काठमाडौंमा आयोजित स्थानीय निर्वाचनमा नेविसंघको भूमिका र पार्टीको दायित्व विषयक विचार गोष्ठीमा बोल्दै नेता कोइरालाले कांग्रेस एक्लै निर्वाचनमा गए पनि गन्तव्यमा पुग्ने बताए ।

कोइरालाले कांग्रेसको केन्द्रीय समितिको बैठकको निर्णय विपरीत गठबन्धनका शीर्ष नेताको बैठक बसेर जिल्लामा निर्णय पठाइएको बताए ।

उनले ३६ लाख नयाँ मतदाता थपिएको उल्लेख गर्दै नयाँ मतदातालाई कांग्रेस बनाउन नसके कांग्रेस कमजोर हुने बताए । कांग्रेसका कार्यकर्ताले अर्को पार्टीमा स्वस्तिक चिन्ह लगाउनुपर्ने अवस्था आएको भन्दै उनले यसको लेखाजोखा निर्वाचन पछि गर्ने पनि बताए ।