तिब्बतीयन शरणार्थी क्याम्प बौद्धको प्रमुखमा फुर्बु टाँसी विजयी

पर्दाफास रिपोर्टर
असार ५, २०७९

काठमाडौं महानगरपालिका–६ को पुरानो अरब बैंकभित्र रहेको तिब्बतीयन शरणार्थी क्याम्पमा शनिबार भएको निर्वाचनमा फुर्बु टाँसी विजयी भएका छन् ।

टाँसी ८०४ मत प्राप्त गरी बौद्ध क्याम्प प्रमुखमा विजयी भएका हुन् । उनका प्रतिद्वन्द्वी काल्साङ लामाले ६५३ मत प्राप्त गरे । सेटलमेन्ट अफिस, पुरानो कार्पेट (डेक्की खान्सार) र गोकर्णेश्वर नगरपालिका–५ जोरपाटीको तिब्बतीयन खम्पा क्याम्पमा निर्वाचन भएको हो । करिब दुई हजार एक सय मतदाता रहेकोमा १ हजार ४ सय ९७ मत खसेको तिब्बतीयन शरणार्थी स्रोतले बताएको छ ।

सेटेलमेन्ट अफिस बौद्धमा ९४० मत, पुरानो कार्पेट बौद्ध (डेक्की खन्सार)मा ४१० मत र खम्पा क्याम्प जोरपाटीमा १४७ मत गरी कुल १ हजार ४ सय ९७ मत खसेको थियो । ४० मत बदर भएको थियो ।

टाँसीले सोमबार तिब्बतीयन शरणार्थी वेलफेयर अफिस लाजिम्पाटको गार्डेन खान्सारमा पद तथा गोपनीयताको सपथ ग्रहण गर्ने कार्यक्रम छ । प्रहरीको उपस्थितिमा तिब्बतियन शरणार्थीको स्थानीय तहको निर्वाचन भएको बताइएको छ ।