नेपाली कांग्रेसका प्रवक्ता प्रकाशशरण महतले पार्टीको ‘घर–घर जाऔँ, कांग्रेस जिताऔँ’ अभियान सफल भएको बताएका छन् ।
मंगलबार यो अभियानबारे जानकारी दिन आयोजना गरिएको पत्रकार सम्मेलनमा बोल्दै महतले यो क्रममा एमसीसीको सम्बन्धमा जनतामा रहेको भ्रमलाई चिर्न सफल भएको पनि उल्लेख गरे ।
कांग्रेसको ‘घर–घर जाऔँ, कांग्रेस जिताऔँ’ अभियान फागुन २९ गतेदेखि मंगलबारसम्म चलेको थियो ।
अभियानमा नेपाली कांग्रेसले गरेका विकास निर्माणको कामको सम्बन्धमा पनि जनतालाई बुझाएको महतले बताए । विगतमा कोभिड–१९ को बेलामा तत्कालिन केपी शर्मा ओली नेतृत्वको सरकारले भ्रष्ट्राचारका कारण कोभिडको व्यवस्थापन गर्न नसकेको भन्दै प्रवक्ता महतले कांग्रेस नेतृत्वको सरकार आएपछि खोपलाई व्यापकता दिन सकेको र कोभिड व्यवस्थापन गर्न सकेको
कुरा जनतालाई स्पष्ट पारको पनि उल्लेख गरे ।
ओली नेतृत्वको सरकारले गरेका गलत काम बारे पनि जनतालाई जानकारी गराउँदै कांग्रेस नेतृत्वको सरकारले गरेका राम्रा कामहरुको प्रचार गरिएको उनको भनाइ छ ।
प्रवक्ता महतले स्थानीय तह निर्वाचन नजिकिए पनि टिकटको तय गर्न प्राविधिक कठिनाइ भएको स्वीकार गरे । गठबन्धन र तालमेलका कारण टिकटको टुंगो लगाउन ढिलाइ भएको उनको भनाइ छ । स्थानीय परिस्थिति र आवश्यकता अनुसार गठबन्धनमा रहेका दलहरुसँग तालमेल गर्ने उनले स्पष्ट पारे ।
उनले भने, ‘टिकटको तय गर्न केही समय लागेको छ । प्राविधिक कठिनाइहरु छन् । र गठबन्धन, तालमेलका पनि कुरा छन् । ति टुंगो लगाउने कुराहरु जटिल नै छन् ।’
महतले अभियानका क्रममा नेपाली कांग्रेसमा हजारौँ मानिस प्रवेश गरेका पनि बताए ।
© न्युज सोसाइटी प्रा.लि.मा सर्वाधिकार सुरक्षित- 2022,
Powered by: Nectar Digit