नेपाल–पाकिस्तान मैत्री टी–२० क्रिकेट प्रतियोगिता सुरु

पर्दाफास रिपोर्टर
फाल्गुण १८, २०७८

नेपाल–पाकिस्तान मैत्री टी–२० क्रिकेट प्रतियोगिता २०२२ को बुधबार उद्घाटन भएको छ । काठमाडौंस्थित पाकिस्तान राजदूतावासले आयोजना गर्दै आएको प्रतियोगिताको यो सातौँ संस्करण हो ।

काठमाडौं महानगरपालिकाका मेयर विद्यासुन्दर शाक्यले प्रतियोगिताको उद्घाटन गरेका हुन् । नौ दिनसम्म चल्ने प्रतियोगितामा १२ वटा क्रिकेट टोलीको सहभागिता छ ।

मेयर शाक्यले यस्ता खेलकुद गतिविधिहरू आयोजना गर्न दूतावासले गर्दै आएको पहलको प्रशंसा गरे । उनले दुई देशका युवालाई एकजुट बनाउन क्रिकेट र खेलकुदको सम्भावनालाई उजागर गरे ।

आफ्नो मन्तव्यमा नेपालका लागि पाकिस्तानी राजदूत सैयद हैदर शाहले कोभिडको समयमा खेलकुद र बाहिरी गतिविधिको महत्व झनै बढेको बताए । उनले नेपालको क्रिकेट सपना साकार पार्न पाकिस्तान सहयोग गर्न इच्छुक रहेको बताए ।

उनले यस कार्यक्रमले दुई देशबीचको मैत्रीपूर्ण सम्बन्धलाई थप प्रगाढ बनाउन सहयोग पुग्ने धारणा राखे । प्रतियोगिता १० मार्च २०२२ मा समापन हुने तालिका छ ।