महामारीमा पनि रोकिएन सुनको तस्करी, कोटेश्वरको सुन पसलमा महाशाखाको छापा

नेपालबाट तेस्रो देशका लागि सिमित उडान भएपनि यसमा यात्रागर्नेहरुलाई प्रयोगगर्दै सुन तस्करहरुले कारोबार गरिरहेको खुलेको छ । 

प्रहरीले सुनको तस्करीमा संलग्न मुख्य ब्यक्ति र त्यसका भरियालाई करिब १२ लाख नगद र एकसय पचास ग्राम सुन सहित नियन्त्रणमा लिएको छ । 

महानगरीय अपराध महाशाखाले भन्सार छलेर त्रिभुवन अन्तर्राष्ट्रिय विमानस्थल मार्फत सुन तस्करी भइरहेको विशेष सूचनापछि शुक्रबार कारबाही गरेको हो । 

जसमा विमानस्थलको मुख्यद्धारबाट रामेछापका गंगाबहादुर थापा मगर शंकास्पद अबस्थामा फेला पारी चेकजाँच गर्दा उनको साथबाट  नगद ११ लाख ८६ हजार रुपैयाँ बरामद भएको थियो । 

महाशाखाको टोलीले थप अनुसन्धानगर्दा उनले सो रकम तस्करी गरेर ल्याएको सुन बेचे बापत पाएको खुलेपछि कोटेश्वरस्थित स्काई ज्वैलर्समा छापा मारेको थियो । 

ज्वैलर्सबाट भन्सार र बिल दुबै नभएका तीनथान बाला बरामद भएको थियो । महाशाखाले ज्वैलर्सका संचालक कुमार सेन्चुरीलाई समेत पक्राउ गरेको थियो  । 

अनुसन्धान अधिकारीहरुका अनुसार पक्राउ परेका सेन्चुरीको सम्पर्क वृत्त बानेश्वर र कोटेश्वर प्रभागका प्रहरी अधिकारीहरुसँग देखिएको छ । यस सम्बन्धमा महाशाखाले अनुसन्धान गरिरहेको छ । 
पक्राउ परेका दुबैलाई आइतबार थप अनुसन्धान तथा कारबाहीका लागि राजस्व अनुसन्धान विभागको जिम्मा लगाएको महाशाखाले जनाएको छ । 

यस्तै बेवारिसे अवस्थामा फेला परेको बुलेट मोटरसाइकल त्रिभुवन अन्तर्राष्ट्रिय विमानस्थलमा बुझाएको महाशाखाले जनाएको छ ।