काठमाडौंमा १६ वर्षअघि अपहरण गरेर लुटपाट गर्ने जगन्नाथ ढकाल पक्राउ

प्रहरीले १६ वर्ष अघि मोटरसाईकलमा सवार ब्यक्तिलाई दिनदहाडै अपहरणगरि लुटपाटगर्ने गिरोहका नाईकेलाई पक्राउ गरेको छ । 

महानगरीय अपराध महाशाखाले ७ असोज २०६१ मा काठमाण्डौको जडिवुटीबाट पिडितलाई नियन्त्रणमा लिएर अपहरण गर्ने समुहका नाईंके जगन्ननाथ ढकाललाई पक्राउ गरेको हो ।

उनको ११ जनाको समुहले बनेपाबाट आउदै गरेका नारायण खनाललाई मुखमा टेप लगाएर बोल्न कराउन नदिई भ्यानमा राखेर एकान्तमा पुगेपछि कुटपीट गर्दै साथमा रहेको नगद, मोटरसाईकल र मोबाईल लुटपाट गरेका थिए ।

उनीहरुले खनालका साथमा रहेको १० लाख सहित करिब १२ लाख रुपैयाँको धनमाल लुटपाट गरेका थिए । 

महाशाखाका अनुसार  ढकाल घटना लगत्तै फरार थिए । उनी विदेशमा गएर बसेका थिए । पछिल्लो समय नेपाल आएको मौकामा उनी पक्राउ परेका हुन् । 

महाशाखाबाट खटिएको विशेष टोली, जिल्ला प्रहरी कार्यालय मकवानपुर र ईलाका प्रहरी कार्यालय पशुपतिनगरबाट खटिएको सयुक्त टोलीले १ मंसिरमा ढकाललाई हेटौडाको  नागसोतीबाट पक्राउ गरेको हो । 

महाशाखाका प्रमुख एसएसपी दीपक थापाका अनुसार जाहेरवाला नारायण खनाल बनेपा मिटिङबाट बा १६ प  ६८२१ नम्वरको मोटरसाईकलमा फर्कदगर्दा यो गिरोहले  जडिवुटीमा उनको अपहरण गरेको थियो । त्यसबेला तत्काल नाम थर नखुलेका ५ जना व्यक्तिहरुले आफुलाई सुरक्षाकर्मी बताउदै उनको अपहरण गरेका थिए ।  

घटनाको अनुसन्धानको क्रममा उक्त घटनामा जगननाथ ढकाल समेत ११ जना व्यक्तिहरुको संलग्नता रहेको खुल्न आई प्रतिवादी कायम भएको थियो । 

तत्कालिन पुनरावेदन अदालत पाटनले १३ चैत्र २०६३ को आदेशले ढकाललाई थुनामा राख्ने आदेश भएपछि उनी तारेख गुजारी बसेका थिए ।  

काठमाण्डौ जिल्ला अदालतले  ६ भदौं २०६४ मा फैसला सुनाउदै ढकाललाई ६ बर्ष कैद र जरिवाना सजाय गरेको थियो । महाशाखाले ढकाललाई फैसला कार्यन्वयनका लागि काठमाडौं जिल्ला अदालतमा उपस्थित गराएको जनाएको छ ।