राष्ट्रिय सभा उपनिर्वाचनको उम्मेदवारी दर्ता आज, बादल र देवकोटाबीच भिडन्त

राष्ट्रिय सभामा बागमती प्रदेशबाट प्रतिनिधित्व गर्ने एक सदस्यको रिक्त पदका लागि हुने उपनिर्वाचन कार्यक्रमअन्तर्गत आज उम्मेदवारी दर्ता हुँदैछ ।

राष्ट्रिय सभा सदस्य रामबहादुर थापालाई नेकपा माओवादी केन्द्र पदमुक्त गरेपछि रिक्त रहेको पदमा उपनिर्वाचन हुन लागेको हो । 

बागमती प्रदेशको राजधानी हेटौंडामा हुने निर्वाचन कार्यक्रमअन्तर्गत निर्वाचन अधिकृतको कार्यालयले मतदाताको अन्तिम नामावली प्रकाशन गरिसकेको छ ।

राष्ट्रिय सभा सदस्यको उपनिर्वाचनमा बागमती प्रदेश सभा सदस्य ११० जना र बागमती प्रदेशका ११८ स्थानीय तहका प्रमुख र उपप्रमुख २ सय २८ जनाले मतदान गर्नेछ्न ।

प्रदेश सभा सदस्यको १ मत बराबर ४८ मतभार रहेको छ भने नगर प्रमुख, उपप्रमुख, गाउँपालिका अध्यक्ष, उपाध्यक्षको १ मत बराबर १८ मतभार रहेको छ ।

बागमती प्रदेशको ११० मतसंख्या बराबर ५२८० मतभार र स्थानीय तहको प्रमुख, उपप्रमुख २३८ मतसंख्याको ४२८४ मतभार रहेको छ । प्रदेशमा ३ सय ४८ जनाले मतदान गर्नेछन् जसको मतभार ९ हजार ५ सय ६४ रहनेछ । 

मतदान कार्यक्रम आगामी जेठ ६ गते हेटौंडास्थित भुटनदेवी माविमा हुनेछ । भुटनदेवी मावि परिसरमा २ मतदान केन्द्र तोकिएको छ । प्रदेश सभा सदस्यको लागि मतदान केन्द्र क र नगर प्रमुख, उपप्रमुख, गाउँपालिका अध्यक्ष, उपाध्यक्षको लागि मतदान केन्द्र ख रहने गरी आयोगले तोकेको छ ।   


बादल र देवकोटाबीच प्रतिस्पर्धा

बागमती प्रदेशमा हुने राष्ट्रियसभाको उपनिर्वाचनमा एमालेका उम्मेदवार रामबहादुर थापा बादल र विपक्षी गठबन्धनका उम्मेदवार खिमलाल देवकोटाबीच प्रतिस्पर्धा हुनेछ । 
 

बादल प्रधानमन्त्री तथा एमाले अध्यक्ष ओलीका उम्मेदवार हुन् भने देवकोटालाई माओवादी केन्द्र, कांग्रेस, जसपा तथा  एमाले भित्रकै झलनाथ खनाल- माधव नेपाल समूहको उम्मेदवारका रुपमा उभ्याईंएको छ । 

देवकोटा माओवादीको चुनाव चिह्नबाट बादलसँग प्रतिस्पर्धा गर्नेछन् । 
 

बागमती प्रदेशसभामा रहेका १ सय १० जना सांसद मध्ये एमालेका ५७ जना सांसद छन् । त्यसमध्ये नेपाल समूहले आफ्नो पक्षमा २२ जना सांसद रहेको दाबी गर्दै आएको छ । त्यसबाहेक माओवादी केन्द्रका २३ र कांग्रेसका २२ जना सांसद छन् ।

अहिलेसम्मको समिकरण अनुसार माधव नेपाल समूहका सांसदलाई छोड्ने हो भने बादलको पक्षमा ३५ जना सांसद हुन्छन् । विपक्षी गठबन्धन कांग्रेस, माओवादी, एमालेको  नेपाल समूह र जसपाका ६८ जना सांसद देवकोटाको पक्षमा देखिएका छन् ।


स्थानीय तहका मतदाताहरूमध्ये सिंगो एमालेका मतदाता १ सय ३३ जना छन् । कांग्रेसका ६७, माओवादी केन्द्रका ३३ र जसपाका १ जना छन् । मतदान गर्न पाउने स्थानीय तहका मतदाता २ सय ३८ मध्ये एमालेसँग १ सय ३३ छन् । तर त्यसमा माधव नेपाल समूहका कति छन् खुलेको छैन ।

अहिले विपक्षी गठबन्धनसँग भने १०१ जनामात्रै देखिएपनि माधव नेपाल समूह थपिएमा त्यो संख्या अझै बढ्नसक्छ । 

राष्ट्रियसभा सदस्य निर्वाचन ऐन अनुसार प्रदेशसभा सदस्यको मतभार ४८ हुन्छ र स्थानीय तहका प्रमुख र उपप्रमुखको मतभार १८ हुन्छ । 

यही अवस्था रहेमा बादलभन्दा देवकोटाको पल्ला भारी देखिन्छ । यसमा माधव नेपाल समूहको ठूलो भूमिका रहनेछ ।