कौडा दाउ हान्दाहान्दै मध्यरातमा दिक्तेलको एउटा खालमा जव प्रहरी पुग्यो....

बिहीबार करिब ११ बजेको थियो । पहाडी जिल्ला दिक्तेल मस्त निन्द्रामा रहेका बेला रुपाकोट मझुवागढी नगरपालिका त्रिवेणी चोकस्थित शारदा श्रेष्ठको घरको एउटा कोठामा भने कौडामा चौंका र छक्का दाउ चम्किएको थियो ।

जुवाडेहरु दाउ हान्नमा मस्त थिए । 

ठिक त्यहीबेला प्रहरी निरीक्षक दिनेश खरेलको टोलीले छापा हान्यो । मस्त निन्द्रामा रहेका छरछिमेकी समेत जागे। एकाएक दिक्तेल बजारको निन्द्रा खलबलियो । 

प्रहरीले बिहीबार मध्यराती त्रिवेणी चोक स्थित शारदा श्रेष्ठको घरमा कोठा लिई वस्ने बिनोद उदासको कोठामा छापा हानेर ४ जना जुवाडेलाई पक्राउ गरेको हो ।

पक्राउ पर्नेमा स्थानिय  सुजन ताम्रकार, युधिर शाक्य,  दिनेशकुमार केसी र  बिनोद उदास रहेका छन् । 

प्रहरीले खालबाट नगद ४९ हजार रुपैयाँ, कौडा २० थान, तास र श्रृखण्ड बरामद गरेको छ ।