मापसे गरेर गालीगलौज गर्दा गयो ज्यान 

मादक पदार्थ सेवन गरेर छिमेकीलाई लागी गलौजगर्दा एकजना युवाले ज्यान गुमाएका छन् । उनको हत्यामा संलग्नलाई जिल्ला प्रहरी कार्यालय रौतहटले पक्राउ गरेको छ । 

रौतहट वृन्दावन नगरपालिका–७ सखुवा धमौरा बस्ने १९ वर्षीय  विकास पासवानले अत्याधिक मादक पदार्थ सेवन गरेर घरफर्कदै गर्दा बाटोमा छिमेकी अमिरी पासवानलाई गाली गलौज गरेका थिए । 

आवेशमा आएका अमिरीले उनीसँग बादविवाद गरे । यसैबिच नजिक रहेका बिन्द पासवान समेत आए । दुबैले विकासलाई कुटपीट गर्दा उनी लडे ।  धकेल्दा लडेर टाउँकोमा चोट लागेका विकासको  उपचारका लागि गरुडा स्थित सिटि अस्पतालमा गएराती मृत्यु भएको हो । 

तत्काल ईलाका प्रहरी कार्यालय गरुडा र प्रहरी चौकी हर्षाहाबाट खटिएको प्रहरी टोलीले विकास पासवान कुटपीटमा संलग्न अमिरी पासवान र  बिन्द पासवानलाई पक्राउ गरेको हो । 

जिल्ला प्रहरी कार्यालय रौतहट समेतबाट प्रहरी टोली खटीएर घटनास्थल पुगी अनुसन्धान गरी शव  पोष्टमार्टमका लागी गौरमा राखिएको छ । 

घटनाका सम्बन्धमा थप अनुसन्धान भइरहेको जिल्ला प्रहरी प्रमुख एसपी सिद्धीविक्रम शाहले बताए ।