लोसपाको चुनावी घोषणापत्र सार्वजनिकः महिलालाई निःशुल्क शिक्षा दिने प्रतिबद्धता 

महन्थ ठाकुर नेतृत्वको लोकतान्त्रिक समाजवादी पार्टी (लोसपा)ले स्थानीय तह निर्वाचनको घोषणा पत्र सार्वजनिक गरेको छ ।

शुक्रबार काठमाडौंको बबरमहलस्थित पार्टी केन्द्रिय कार्यालयमा लोसपाले उक्त घोषणापत्र सार्वजनिक गरिएको हो । घोषणापत्रमा सबै महिलाहरुलाई निःशुल्क शिक्षा हासिल गर्नुपर्ने व्यवस्था गर्ने, सार्वजनिक सवारी साधन निःशुल्क गर्ने, गरिवका लागि स्वास्थ्य उपचार निःशुल्क हुने व्यवस्था गर्ने महत्वकांक्षी योजना उल्लेख गरिएको छ ।  

त्यस्तै घोषणापत्रमा घरघरमा रोजगारी, प्राथमिक शिक्षा, स्वास्थ्य, खानेपानी र विकास निर्माणको कामलाई तीव्रता दिने प्रतिवद्धता उल्लेख गरिएको पार्टीका अध्यक्ष ठाकुरले बताए ।  उनले सीमा क्षेत्रको संवेदनशीलतालाई बुझेर त्यहाँका जनजीवनको सुरक्षा गर्नुपर्ने कुरालाई पनि घोषणापत्रमा प्राथमिकता दिइएको स्पष्ट पारे । घोषणापत्रमा आर्थिक समानता र स्वतन्त्रता हुनुपर्ने पनि भनिएको छ । 

जनकपुरलाई अन्तराष्ट्रिय स्तरको प्रदेश राजधानी बनाउने, वीरगंजलाई नेपालको आर्थिक कारोबार र व्यापारको प्रमुख केन्द्र बनाउने, विराटनगर, भैरहवा र नेपालगञ्जलाई नेपालको आर्थिक विकासको मेरुदण्डको रुपमा विकास गर्ने, लुम्बिनीलाई बुद्ध धर्मावलम्बीको लागि अन्तर्राष्ट्रिय तीर्थस्थल र ध्यान केन्द्र बनाउनेसम्मका योजना घोषणापत्रमा समावेश छ ।

घोषणा पत्र सार्वजनिक कार्यक्रममा बोल्दै लोसपाका नेता राजेन्द्र महतोले निर्वाचनकै मजाक हुने गरी सत्तारुढ दलले चुनावी गठबन्धन गरेको आरोप लगाए । 
उनले सत्तारुढ दल चुनावमा जाँदा जनताले कुन पार्टी भनेर बुझ्ने? भनी प्रश्नसमेत गरे ।

देश र दुनियाँले नबुझ्ने गरी सत्तारुढ दलहरुले गठबन्धन बनाएर चुनावमा गएको नेता महतोको भनाइ थियो । उनले गठबन्धनको नाममा दलहरुलले जनतालाई मजाक बनाइरहेको उल्लेख गरे । 

महतोले दलीय प्रणालीमा दलहरु आफैं निर्वाचनमा जाने भएकाले आफ्नो पार्टीले गठबन्धन गरेर जाने विषयलाई महत्व नदिएको तर्क गरे । उनले स्थानीय तहमा आवश्यकताको आधारमा अन्य दलसँग चुनावी तालमेल गरेर जाने निर्णय गर्ने अधिकार स्थानीय पार्टीलाई दिइएको बताए ।