एमसीसी पास हुनु ऐतिहासिक र महत्वपूर्ण काम होः गृहमन्त्री खाण 

गृहमन्त्री बालकृष्ण खाणले नेपालकै प्रस्तावमा एमसीसी आएको दाबी गरेका छन् । बुधवार नेपाल तरुण दलले आयोजना गरेको भेलालाई सम्बोधन गर्दै खाणले यस्तो बताएका हुन् । 

एमसीसी प्रस्ताव पास हुनु नेपालकै लागि निकै ऐतिहासिक र महत्वपूर्ण कार्य भएको खाणको भनाइ छ । यो परियोजनाले नेपालमा गरिबी निवारण र नेपालमा  रोजगारी अभिवृद्धिका लागि महत्वपूर्ण सहयोग पुग्ने उनले बताए । 

खाणले कतिपयले एमसीसी पास गरेपछि अमेरिकाबाट सेना र बम बारुद आउँछ भन्ने भ्रम छरिरहेको उल्लेख गर्दै बिजुलीको तारबाट बम बारुद र सेना नआउने जिकिर गरे ।

गृहमन्त्री खाणले पूर्ववर्ती सरकारले करिव ४ वर्षसम्म एमसीसी परियोजनालाई अनिर्णयको बन्दी बनाएर नेपालको भौतिक विकासमा अवरोध सिर्जना गरेको आरोपसमेत लगाए ।  उनले एमसीसी परियोजनाबाट बम, बारुद र सेना आए नेपाली काँग्रेस अग्रपंक्तिमा रहेर लड्ने बताए ।

यो परियोजनाले नेपालको जलविद्युतको विकासका लागि धेरै ठूलो आयाम स्थापित गर्ने उनको दाबी छ । 

खाणले नेपालको अर्थतन्त्रलाई उकास्न र पेट्रोलियम पदार्थको आयात घटाउन कम गर्न एमसीसी कोशेढुंगा साबित हुने दाबी गरे । 

गृहमन्त्री खाणले स्थानीय तह निर्वाचनका लागि टिकट दिने क्रममा अनियमितता भए त्यसको अनुसन्धान हुने र कारबाही गरिने प्रतिबद्धता पनि व्यक्त गरे । उनले आगामी निर्वाचनमा नेपाली कांग्रेस देशकै ठूलो पार्टी हुने दाबी गरे ।