अबको काम महानगरवासीमा समर्पित हुन्छः चिरिबाबु महर्जन

ललितपुर महानरपालिकाको मेयरमा विजयी भएका  चिरिबाबु महर्जनले शपथग्रहण गरेका छन् । 

बुधवार मेयरमा निर्वाचित महर्जन र उपमेयरमा निर्वाचित मञ्जली शाक्यले अबको काम महानगरवासीमा समर्पित हुने बताएका छन् । 

मेयरमा महर्जनको यो दोस्रो कार्यकाल हो । महानगरका समस्या समाधानका लागि आफू तत्पर रहन उनले बताए । नर्वाचन अघिसम्म पार्टीका कुरा गरे पनि अब जनताका समस्या समाधान गर्ने उनको भनाइ छ । 

उनले भने, ‘निर्वाचनमा  पार्टीको कुरा  गर्‍यौं तर अब समग्र ललितपुर महानगरपालिकावासीको कुरा गर्नेछौं । महानगरमा आएका कुराहरु, समस्याहरु समाधानमा अहोरात्र लाग्नेछौँ । हामी राजनीतिक रुपमा अब प्रस्तुत हुन मिल्दैन । हाम्रा लागि सबै बराबर हुन् । हामी टिमवर्कको रुपमा काम गर्नेछौँ । शिरमा महानगरपालिकावासीलाई राखेर काम गर्नेछौँ ।’

सत्ता गठबन्धनको तर्फबाट नेपाली काँग्रेसका नेता महर्जन ललितपुर महानगरको मेयरमा विजयी बनेका छन् भने उपमेयरमा नेकपा एमालेकी मञ्जली शाक्य निर्वाचित भएकी छिन् ।  

मेयर महर्जनले नेकपा एमालेका उम्मेदवार हरिकृष्ण व्यञ्जनकारलाई १८ हजार १६२ मतान्तरले पराजित गरेका हुन् ।  उनले ४२ हजार ७२२ मत प्राप्त गरेका थिए ।