स्थानीय निर्वाचनका लागि ८० प्रतिशत मतपत्र छपाइ सम्पन्न 

निर्वाचन आयोगले सोमबारसम्म ८० प्रतिशत मतपत्र छपाइको काम सम्पन्न भएको बताएको छ। सोमबार आयोगले गरेको नियमित पत्रकार भेटघाटका क्रममा आयोगका प्रवक्ता शालिग्राम शर्मा पौडेलले अहिलेसम्म ६८ जिल्लाका लागि १ करोड ५४ लाख ८३ हजार मत पत्र छपाइ सकिएको बताएका हुन् ।

निर्वाचन आयोगले एक करोड ९४ लाख मतपत्र आवश्यक पर्ने अनुमान गरेको छ । त्यस्तै बाँकी रहेको मतपत्र छपाइको काम पनि जारी रहेको पौडेलको भनाइ छ । 

आयोगका अनुसार मंगलबारदेखि स्थानीय तहको लागि मतपत्र ढुवानीको काम सुरु हुनेछ । आयोगले निर्वाचन आचारसंहिताको पूर्ण पालना गर्न सम्बन्धित सबै पक्षलाई पनि सचेत गराएको छ ।

निर्वाचनलाई स्वच्छ, स्वतन्त्र, भयरहित तथा पारदर्शी बनाउन आयोगले सो आह्वान गरेको उल्लेख गर्दै पौडेलले निर्वाचन आचारसंहिताको पूर्ण पालना नगर्ने राजनीतिक दल तथा उम्मेदवारमाथि निर्वाचन कसुर अनुसार कारबाही हुने चेतावनी दिए ।

आयोगले सरुवा, पदस्थापन वा काजमा खटाइएका कर्मचारीलाई निर्वाचन सम्पन्न गराउने प्रयोजनका लागि तोकिएको ठाउँमा यही बैशाख १५ गतेभित्र अनिवार्यरुपमा हाजिर हुने व्यवस्था मिलाउन पनि सम्बन्धित पक्षलाई निर्देशन दिएको छ । 

निर्वाचन आयोगले हालसम्म निर्वाचनको पर्यवेक्षणका लागि ६८ वटा संस्थाले अनुमति लिएको पनि उल्लेख गरेको छ । ती संस्थाका करिब २० हजार पर्यवेक्षकलाई आयोगको परिचय पत्रसहित मतदान केन्द्रमा परिचालन गरिने पनि आयोगका प्रवक्ता पौडेलले बताए ।

निर्वाचन आयोगले आयोगका सहसचिव तुलसीबहादुर श्रेष्ठ र सहन्यायाधिवक्ता गुरु वाग्लेलाई निर्वाचन सूचना सम्प्रेषण अधिकारी पनि तोकेको छ । आयोगका प्रवक्ता र सहप्रवक्ताको अतिरिक्त उनीहरुलाई पनि निर्वाचनको सूचना दिन निर्वाचन सूचना सम्प्रेषण अधिकारी तोक्नु परेको प्रवक्ता पौडेलले बताए ।