ऊर्जा क्षेत्रको सहकार्यका लागि नेपाल र भारतबीच सचिवस्तरीय बैठक

न्यूज एजेन्सी नेपाल
फाल्गुण १२, २०७८

भारतका ऊर्जासचिव आलोक कुमार बिहीबार नेपालका प्रधानमन्त्री शेरबहादुर देउवासँग भेटवार्ता गर्दै । तस्बिर : भारतीय राजदूतावास

ऊर्जा क्षेत्रको विकास र सहकार्यका लागि नेपाल र भारतबीच दुई देशीय सचिवस्तरीय बैठक सुरु भएको छ ।

बिहीबार काठमाडौंमा सुरु भएको दुई दिने बैठकमा नेपाल र भारत सरकारबीच ऊर्जा क्षेत्रको सहकार्यका लागि सचिवस्तरीय छलफल सुरु भएको हो ।

संयुक्त कार्य समूह (जेडब्ल्यूजी) र संयुक्त सञ्चालन समिति (जेएससी) बीचको छलफलमा नेपालको तर्फबाट ऊर्जा, जलस्रोत तथा सिँचाइ सचिव देवेन्द्र कार्की र सागर कुमार राई सहभागी छन् ।

भारतको तर्फबाट भारत सरकारका ऊर्जासचिव आलोक कुमार र नेपालस्थित भारतीय राजदूतावासकी मिसन उपप्रमुख नामग्या खाम्पा सहभागी छन् । आजदेखि सुरु भएको सचिवस्तरीय बैठकमा नेपाल र भारतको उर्जा क्षेत्रको सहकार्यका लागि छलफल हुनेछ । बैठक भोलि (शुक्रबार) सम्म चल्नेछ ।

भारतका ऊर्जासचिव आलोक कुमारले बिहीबार नेपालका प्रधानमन्त्री शेरबहादुर देउवा र ऊर्जामन्त्री पम्फा भुसालसँग भेटवार्ता गरेका थिए ।