युक्रेनको दाबी– २० हजार रुसी सैनिक मारिए 

युक्रेनले रुसले आक्रमण सुरु गरेयता अहिलेसम्म उसका करिब २० हजार सैनिक मारिएको दाबी गरेको छ।

शुक्रबार युक्रेनको रक्षा मन्त्रालयले सामाजिक सञ्जाल ट्वीटरमार्फत यस्तो जानकारी दिएको हो । युक्रेनको रक्षा मन्त्रालयका अनुसार यो युद्धको क्रममा रुसले ठूलो क्षतिको सामना गरेको छ। 

अहिलेसम्म रुसको ७५६ सैन्य ट्यांक ध्वस्त पारेको युक्रेनको दाबी छ । त्यस्तै झण्डै २ हजार बख्तरबन्द गाडीहरु/एपीभी ध्वस्त भएका छन् ।

६६ ओटा हवाई सुरक्षा प्रणाली तथा १६३ लडाकु विमान पनि यो अवधिमा ध्वस्त पारेको युक्रेनले बताएको छ । रुसका ८ ओटा जहाज तथा डुङ्गाहरु ध्वस्त हुँदा ७६ ओटा इन्धन बोकेका ट्यांक ध्वस्त पारेको युक्रेनले बताएको छ । 

रुसले युक्रेनमाथि आक्रमण सुरु गरेको ५० दिन पूरा भइसकेको छ। युक्रेनका राष्ट्रपति भोलोदिमिर जेलेन्स्कीले यो अवधिमा मुलुकलाई बचाउन लड्ने नागरिकप्रति सम्मान व्यक्त गरेका छन् ।

जेलेन्स्कीले जर्मनीले र हंगोरीले रुसको तेल आयातमा प्रतिबन्ध नलगाएको भन्दै आक्रोश व्यक्त गरेका छन् । उनीहरुले रुसमाथि प्रतिबन्ध नलगाउँदा रुसलाई यस वर्ष ३ खर्ब २६ अर्ब डलरसम्मको फाइदा हुन सक्ने जेलेन्स्कीको भनाइ छ ।