एलन मस्कले ४४ अर्ब डलरमा किने ट्वीटर, ठूलो परिवर्तन ल्याउने घोषणा

पर्दाफास रिपोर्टर
ब‌ैशाख १३, २०७९

सामाजिक सञ्जाल ट्वीटरको सञ्चालक समिति (बोर्ड) ४४ अर्ब अमेरिकी डलरमा उक्त कम्पनी अधिग्रहण गर्ने अर्बपति एलन मस्कको प्रस्तावमा सहमत भएको छ । मस्कले दुई साताभन्दा कम समयअघि सबैलाई चकित पार्दै ट्वीटर खरिदको प्रस्ताव गरेका थिए ।

सन् २००६ को मार्चमा यसको स्थापनापछि ट्वीटरले २१ करोड ७० लाख दैनिक सक्रिय प्रयोगकर्ता जम्मा गरेको छ । तीमध्ये ८० प्रतिशतभन्दा बढी अमेरिका बाहिरका छन् ।

मस्कले हालको अवस्थामा ट्वीटरमा ‘व्यापक सम्भावना’ रहेको र ती सम्भावनाका ढोकालाई आफूले खोल्ने बताएका छन् । उनले नक्कली खाता हटाउने तथा कैयौं प्रतिबन्धलाई खुकुलो पार्नेसम्मका धेरै परिवर्तनका लागि आह्वान गरेका छन् । ट्वीटरले सुरुमा मस्कले प्रस्ताव अस्वीकार गरेको थियो ।

फोर्ब्स पत्रिकाकाअनुसार मस्क विश्वका सबैभन्दा धनी व्यक्ति हुन् । उनको अनुमानित सम्पत्ति २ खर्ब ७३ अर्ब ६० करोड डलर छ । उनी विद्युतीय सवारीसाधन निर्माता टेस्लाको मुख्य शेयरधनी पनि हुन् ।