थापाथली क्याम्पसकी गौतमलाई ‘शंकर लाल अग्रवाल गोल्ड मेडल’ सम्मान

पर्दाफास रिपोर्टर
फाल्गुण ३०, २०७८

इन्स्टिच्युट अफ इञ्जिनियरिङ (आइओई), थापाथली क्याम्पसले आफ्नो ५६औँ वार्षिक समारोहका अवसरमा क्याम्पस प्रांगणमा एक कार्यक्रमको आयोजना गरेको छ ।

संस्थागत सामाजिक उत्तरदायित्वअन्तर्गत शंकर गु्रपको भगिनी संस्था जगदम्बा स्टिलको सहकार्यमा उक्त कार्यक्रमको आयोजना गरिएको थियो ।

कार्यक्रममार्फत २०७३ सालको त्रिभुवन विश्वविद्यालयअन्तर्गत आयोजित इञ्जिनियरिङ संकायको परीक्षामा इञ्जिनियरिङ संस्थान, थापाथली क्याम्पसकी स्नातक तहमा सर्वोत्कृष्ट अंक ल्याउन सफल रितिशा गौतमलाई सम्मानित गरिएको छ ।

उनलाई श्री शंकर लाल अग्रवाल स्वर्ण पदक २०७८ का साथै ५१ हजार नगद पुरस्कारले सम्मान गरिएको हो । शिक्षा मन्त्री देबेन्द्र पौडेलको प्रमुख आतिथ्यमा उक्त समारोह आयोजना गरिएको थियो ।

विशेष अतिथिका रुपमा शंकर गु्रपका महाप्रबन्धक सेल्स एण्ड मार्केटिङ मनोज तिवारी र क्याम्पसका प्रमुख जनार्दन भट्ट लगायतको उपस्थिति थियो ।