योगेश भट्टराईलाई तान्न ओलीको चाल, पहाडीलाई मन्त्री उपहार

साढे दुई दशक पहिले निर्विरोध गाविस अध्यक्ष निर्वाचित भएका गणेशकुमार पहाडी बिहीबार सङ्घीय मामिला तथा सामान्य प्रशासनमन्त्रीका रुपमा नियुक्त भएका छन् ।

प्रधानमन्त्री केपी शर्मा ओलीले बिहीबार विस्तार गरेको मन्त्रिपरिषदमा उनले सो मन्त्रालयको जिम्मेवारी पाएका हुन् । नवनियुक्त मन्त्री पहाडी विसं २०७४ को निर्वाचनमा सिन्धुली–१ बाट प्रतिनिधिसभामा निर्वाचित भएका थिए । 

नेकपा एमालेको नवौँ महाधिवेशनबाट केन्द्रीय सदस्यमा निर्वाचित उनी दोस्रो संविधानसभाको निर्वाचनमा पनि सोही क्षेत्रबाट निर्वाचित भएका थिए ।

सिन्धुलीस्थित फिक्कल गाउँपालिका-४ खाङसाङ स्थायी ठेगाना भएका पहाडी संघीय राजधानी काठमाडौँमा बस्छन् । २०२६ असार ९ गते सिन्धुलीमा जन्मिएका उनको परिवारमा श्रीमती शोभा खड्का, एक छोरी र एक छोरा  छन् । पहाडीको शैक्षिक योग्यता बलियो छ । उनले समाजशास्त्रमा स्नातकोत्तर र सिभिल इन्जिनियरिङ गरेका छन् ।

पहाडी नेता योगेश भट्टराईनिकट हुन् । पहाडी विद्यार्थीकालदेखि नै भट्टराईसँग निकट रहँदै आएका थिए । कांग्रेस सभापति शेरबहादुर देउवालाई प्रधानमन्त्री बनाउन हस्ताक्षर गरेका पहाडी पछिल्लो समय मौन रहेका थिए । नेपाल गुटबाट योगेश भट्टराई आफ्नो पक्षमा पार्न ओलीले पाहाडीलाई प्रयोग गरेका छन् ।

उनी विसं २०५४ मा खाङसाङ गाविसमा अध्यक्षका रुपमा निर्विरोध निर्वाचित भएका थिए । पार्टीमा उनी विसं २०६७ मा राष्ट्रिय प्रतिनिधि परिषद् सदस्य भएका थिए । 

विसं २०३९ मा अनेरास्ववियु एकता, पाँचौँ बाट राजनीति शुरु गरेका उनले २०४८ सालमा एमालेको सिन्धुली काठमाडौँ सम्पर्क मञ्चको संयोजक समेत गरे। 

उनी विसं २०६५ मा जिल्ला कमिटी सचिव र विसं २०६६ मा जिल्ला संयोजक भएका थिए । स्नातकोत्तरसम्मको अध्ययन पूरा गरेका उनी दुवै पटक सांसद् हुँदा प्रतिनिधिसभाको विकास समितिका सदस्य थिए । 

यसअघि गत पुसमा प्रधानमन्त्री ओलीले गर्नुभएको मन्त्रिपरिषद् विस्तारमा गणेशसिंह ठगुन्नाले सो मन्त्रालयको जिम्मेवारी पाएका थिए ।