Wednesday, 09 October 2024 | २०८१ असोज २३, बुधबार

जर्मन होम हस्पिटालिटी : भक्तपुरकै पहिलो ठूलो व्यापारिक केन्द्र

मध्यपुरथिमि नगरपालिका–३ गठ्ठाघरमा वर्षौ अगाडि जर्मन शैलीमा बनेको एउटा सुन्दर घर, जस्ताको त्यस्तै उभिएको छ । घर वरिपरिमा ठूला रुख र खाली जमिनलाई सम्याएर धमाधम नयाँ संरचना निर्माण भइरहेका छन् । 

 

भक्तपुर जिल्लामै फरक शैलीमा निर्माण गरिएको ‘जर्मन होम हस्पिटालिटी’ ले आफ्नो स्वरुपमा पूर्णता पाउन अझै एक महिना लाग्ला तर जर्मन होमको पुरानो आकर्षक संरचना र हस्पिटालिटीको दोस्रो तलासम्मको आकर्षक शैलीमा भने हतार गर्दै रातारात आज निर्माण सम्पन्न गरिएको छ । 

 

नेकपा एमालेको २५ र २६ गते ३०१ सदस्यीय केन्द्रीय समितिको दोस्रो बैठक यहीँ बस्ने भएपछि यो घर भक्तपुरमा एकाएक चर्चामा आएको छ । बैठकस्थल रातारात आकर्षक र सुन्दर शैलीमा निर्माण गरिएको छ । बैठकस्थलको तयारी र अवस्थाका बारेमा एमाले केन्द्रीय सदस्य एवं सांसदद्वय महेश बस्नेत, राजीव पहारी, एमाले भक्तपुर जिल्ला कमिटी अध्यक्ष वचन देउजा र नेता किरण थापालगायतले आज अनुगमन गरेका हुन् । अनुगमन पछि प्रतिक्रिया दिँदै सांसद बस्नेतले भोलिदेखि भक्तपुरमा सुरु हुने एमालेको केन्द्रीय बैठकस्थलको तयारी पूरा भएको बताएका छन् ।
    

‘राजधानी नै भए पनि भक्तपुर सधैँ ओझेलमा पर्दै आएको थियो, तर पछिल्लो चार वर्षमा भक्तपुरको विकासले फड्को मारेपछि देशका ठूलो कार्यक्रम पनि भक्तपुरमा हुन थालेपछि यहाँका व्यवसायी उत्साहित भएर व्यापारिक क्षेत्रमा लगानी बढाइरहेका छन्, भक्तपुर अब पर्यटकीय मात्रै नभई व्यापारिक हवको रुपमा पनि पहिचान बनाउन थालेको छ’ उनले भने ।

 

‘मेरै घर अगाडि रहेको यो घरलाई सबैले जर्मन घर भन्ने गर्थे, जर्मन शैलीको घर, फराकिलो हरिया रुखको कम्पाउण्ड, निकै राम्रो थियो, जर्मनमा व्यवसाय सञ्चालन गर्दै आएका र धेरै समय जर्मनमै बस्ने व्यवसायीको यो घरलाई अहिले यहाँका युवा व्यवसायीले भाडामा लिएर नयाँ संरचना थप्दै जर्मन होम बनाएपछि यहाँको विकासमा चमक थपिएको छ’  एमाले भक्तपुर जिल्ला कमिटी अध्यक्ष देउजा भने ।

 

जर्मन होम हस्पिटालिटीका सञ्चालक रामशरण तिमिल्सिनाले २० वर्षभन्दा बढी समयका लागि जर्मन होम भाडामा लिएर काठमाण्डौ बिर्साउने गरी व्यावसायिक केन्द्र निर्माण सुरु गरेको बताएका छन् । 

 

‘जर्मन हाउस आफैँमा पनि आकर्षक छ, त्यसमाथि पनि भक्तपुरमा एउटा व्यापारिक हवको कमी भइरहेको अबस्थामा त्यसलाई पूरा गर्ने हामीले जमर्को गरेका छौँ, हाम्रो चाहनालाई यो ठाउँले पुरा गरेको छ, यहाँ अब काठमाडौँका ठूला मल भन्दा फराकिलो र ठूला व्यावसायिक एवं व्यापारिक केन्द्रको रुपमा विकास गर्दैछौँ’ उनले भने ।

 

यहाँका हलमा कुमारी, टल्किएका सेता हिमाल, भक्तपुरलगायत उपत्यकाका विभिन्न सम्पदाको सुन्दर पेन्टिङ र ढलौटका चम्किला मूर्तिले आकर्षक बनाएको छ भने बाहिरी सुन्दरतालाई पनि उत्तिकै आकर्षक बनाइएको छ । यहाँ दुई हजार जना अटाउने क्षमताको दुई वटा कार्यक्रम स्थल निर्माण गरेको छ । झण्डै रु २० करोडभन्दा बढीको लागतमा १०० जनाभन्दा बढीलाई प्रत्यक्ष रोजगारी दिने गरी जर्मन होम हस्पिटालिटीसँगै सम्पूर्ण व्यापारिक केन्द्रका रुपमा आगामी नयाँ वर्षबाट पूर्णरुपमा सञ्चालनमा आउने गरी भौतिक संरचना निर्माण भइरहेका छन् । 

 

‘हामीले आकर्षक व्यापारिक केन्द्र र मल खोज्दै काठमाडौँ धाउनुपथ्र्यो, अब पर्दैन, पूजाका सम्पूर्ण सामग्रीदेखि बैंक, वित्तीय संस्था, सपिङ सेन्टर, एमआरआइ डाइग्नोस्टिक सेन्टरलगायतका स्वास्थ्य सेवा, विभिन्न कम्पनीका गाडीका शो रुम, लत्ताकपडा, फर्निचर, दैनिक उपभोग्य सामग्रीसहितको सपिङ मल, रेष्टुराँ, नाइट क्लबसम्म सञ्चालन गर्ने गरी तयारी गरेका छौँ । भक्तपुरमा उपत्यकाकै फरक प्रकृतिको व्यापारिक कम्प्लेक्सका रुपमा यसको विकास गर्दैछौँ, यो सुरु भए पछि कुनै पनि सामानका लागि सपिङ मल खोज्दै अब काठमाण्डौ जानुपर्दैन उनले भने ।

 

शान्त वातावरण, पारिवारिक एवं मनोरमस्थल, हाइजेनिक खाना, आकर्षक शैलीको भवन, विदेशी पर्यटकलाई समेत आकर्षित गर्दै नगरकोट धुलिखेल जानुअघि वा फर्कदा यहाँ बसेर ब्रेकफास्ट, लन्च लिने सकिने, यहाँ एकछिन रमाउन सकिने गरि व्यवस्थापन गरेको भन्दै उनले भक्तपुरका लागि यो एउटा उदाहरणीय व्यापारिक केन्द्र बन्ने विश्वास व्यक्त गरेका छन् । 

 

‘कोरोना महामारीको जोखिम त छँदैछ, तर त्यसलाई सम्झेर सबै रोक्न र रोकिनु पनि हुँदैन, महामारीले अवसर पनि ल्याएको छ भन्ने हामीले सम्झिएका छाैँ, त्यसैले ठूलो लगानीमा जोखिम मोलेका हौँ’ उनले भने ।

 

सरकारले व्यवसाय गर्नसक्ने वातावरण बनाइदिए अहिलेका युवा पुस्ताले जमिन भाडामै लिएर भएपनि राम्रो व्यवसाय सञ्चालन गर्न सक्छन् भन्ने सन्देश पनि यसले दिएको छ । यसमा यहाँका युवा व्यवसायी तिमिल्सिनासँगै थानेश्वर बस्याल, प्रविण श्रेष्ठलगायत पाँच जनाले संयुक्त लगानी गरेका छन् ।

प्रतिक्रिया

सम्बन्धित समाचार सबै