सवारी दुर्घटनामा परी दुईजनाको मृत्यु 

मोरङ र धनुषामा भएको दुई छुट्टाछुट्टै दुर्घटनामा परी दुईजनाको मृत्यु भएको छ ।

प्रहरीले दिएको जानकारी अनुसार मोरङको  केराबारी गाउँपालिका–८ स्थित सडकमा को–२ त ६७०० नम्बरको ट्याक्टर दुर्घटनामा परी सोही गाउँपालिका–१० बस्ने १९ वर्षीय पिलिज बिकको मंगलबार बिहान मृत्यु भएको छ । स्ट्रिङमा च्यापिएर गम्भीर घाइते भएका उनको सुकुना अस्पतालमा उपचारको क्रममा मृत्यु भएको हो । 

त्यस्तै धनुषास्थित मिथिला नगरपालिका–११ बाहुनमारास्थित सडकमा प्र–१–०२–००२ च ५२६३ नम्बरको पिकअपले ना–५२ प ५१३० नम्बरको मोटरसाइकललाई मंगलबार बिहान ठक्कर दिँदा मोटरसाइकल चालक रौतहट चन्द्रनिगाहपुर नगरपालिका–५ बस्ने ५६ वर्षीय शेर बहादुर राईको घटनास्थलमै मृत्यु भएको छ ।

पिकअप चालकलाई प्रहरीले नियन्त्रणमा लिएको छ । दुर्घटनाका सम्बन्धमा आवश्यक अनुसन्धान भइरहेको प्रहरीले बताएको छ ।