आयात बढ्नुमा निजी क्षेत्र होइन, सरकारकै नीति दोषी छः शेखर गोल्छा 

नेपाल उद्योग वाणिज्य महासंघका अध्यक्ष शेखर गोल्छाले पछिल्लो समय अत्याधिक रुपमा आयात बढ्नुमा निजी क्षेत्र नभएर सरकारी नीति दोषी रहेको बताएका छन् । 

बुधबार नेपाल आर्थिक पत्रकार समाज (सेजन)ले आयोजना गरेको कार्यक्रममा बोल्दै गोल्छाले आयात बढ्नुमा निजी क्षेत्र नभएर सरकारी नीति दोषी रहेको बताएका हुन् । उनले सरकार विगतदेखि  राजस्वमुखी भएकाले राज्य राजस्वमुखी भएर हिडुन्जेलसम्म आर्थिक अवस्थामा निरन्तर दबाब परिरहने बताए । 

गोल्छाले निजी क्षेत्रले नेपालको अर्थतन्त्रलाई श्रीलंकासँग कहिल्यै तुलना नगरेको बताए । मुलुकको अहिलेको आर्थिक अवस्थालाई श्रीलंकासँग तुलना गर्नु नै गलत भएको उनको बुझाइ छ । गोल्छाले नेपालको वर्तमान अर्थतन्त्रलाई श्रीलंकासँग तुलना गर्नाले छविसमेत बिग्रिएको बताए । 

त्यस्तै, राष्ट्रिय योजना आयोगका पूर्वउपाध्यक्ष एवम् अर्थशास्त्री स्वर्णिम वाग्लेले नेपालमा पनि अर्थतन्त्र बिगार्ने शासकीय स्वरुप देखिन थालेको बताए । श्रीलंकामा शासकले हचुवाको भरमा निर्णय गर्दा मुलुकको अर्थतन्त्रमा समस्या बढेको भन्दै वाग्लले नेपालमा पनि त्यस्तै प्रवृत्ति हाबी हुने गरेको उल्लेख गरे । वाग्लेले श्रीलंकामा जथाभावी रूपमा कर चलाउँदा समस्या भएको बताउँदै कर नीति चलाउँदा सजग हुनुपर्ने बताए । 

त्यस्तै, नेपाल बैंकर्स संघका उपाध्यक्ष सुनिल केसीले पोहोरबाटै चालु आर्थिक वर्षको अन्त्यसम्ममा राष्ट्र बैंकको १९ प्रतिशतको कर्जा विस्तार गर्ने लक्ष्य पनि पूरा हुन नसक्ने बताए । उनले पछिल्लो तथ्यांक विश्लेषण गर्दा चालु आर्थिक वर्षभर तरलता सहज नहुने देखिएका बताए । 

त्यस्तै, नेपाल उद्योग परिसंघका अध्यक्ष विष्णुकुमार अग्रवालले मुलुकमा देखिएको अर्थतन्त्रको अहिलको अवस्था नयाँ नभएको बताए । अहिलेको अवस्थालाई सरकारले अवसरको रूपमा लिनुपर्ने उनको भनाइ छ अहिले अर्थतन्त्रमा संकट आएरको नभएर समस्या भएको अध्यक्ष अग्रवालको भनाइ छ ।

अर्थतन्त्रमा देखिने यस्ता समस्यालाई हामीले अवसर बनाउन सकिए आगामी दिनमा यस्ता समस्या नदोहोरिने उनले बताए ।  अहिलेको अर्थतन्त्रको समस्या समाधानको लागि  प्रत्यक्ष वैदेशिक लगानी भित्र्याउनुपर्नेमा उनले जोड दिए ।