नेप्सेमा ६३ अंकले वृद्धि

शेयर बजार मापक नेप्से परिसूचक आइतबारदेखि निरन्तर रुपमा बढ्न थालेको छ । 

आइतबार ६० अंकले बढेको नेप्से सोमबार पनि त्यसैको निरन्तरता स्वरुप ३२ अंकले बढेको थियो । आइतबार र सोमबारको  भन्दापनि मंगलबार नेप्से परिसूचक उच्च अंकले वृद्धि भएको छ । मंगलबार नेप्से परिसूचक ६३.०१ अंकले बढेर २ हजार ६७९.९५ विन्दुमा पुगेको छ । त्यस्तै ठूला कम्पनीको शेयर मूल्य मापक गर्ने सेन्सेटिभ इण्डेक्स पनि  ३.२५ अंक, फ्लोट इण्डेक्स २.८६ अंक र सेन्सेटिभ फ्लोट इण्डेक्स ३.९६ अंक बढेको छ ।

मंगलबार कारोबारमा आएका २३४ कम्पनीको ९१ लाख १० हजार ७५८ कित्ता शेयर ४ अर्ब ३२ करोड २६ लाख ९ हजार ८२७ रुपैयाँको शेयर कारोबार भएको छ । सोमबार  ४ अर्ब ५३ करोड ३० लाख १७ हजार रुपैयाँ बराबरको शेयर कारोबार भएको थियो । तर सोमबारको  तुलनामा मंगलबारको कारोबार रकम घटेको छ ।  

नेप्सेका १३ उपसमूहमध्ये उत्पादन तथा प्रशोधन उपसमूह र अन्य उपसमूहबाहेक  सबै उपसमूहको परिसूचकमा आज पनि हरियाली छाएको छ । जसमध्ये विकास बैंक उपसमूहको परिसूचक सबैभन्दा बढी ५.२३ प्रतिशत बढेको छ । त्यस्तै, बैंकिङ्ग, वित्त, जलविद्युत र लगानी उपसमूहको परिसूचक ३ प्रतिशतभन्दा बढी बढेको छ भने होटल तथा पर्यटन उपसमूहको परिसूचक २ प्रतिशतभन्दा बढी बढेको छ । कारोबारमा आएको उत्पादन तथा प्रशोधनको ०.५९ प्रतिशत र अन्य उपसमूहको परिसूचक  ०.३४ प्रतिशत घटेको छ ।

मंगलबार तीन कम्पनीहरुको शेयर सकारात्मक सर्किट लेभलमा कारोबार भएको छ । जसमा श्री इन्भेष्टमेन्ट एण्ड फाइनान्स, सप्तकोशी डेभलपमेन्ट बैंक र मध्य भोटेकोशी जलविद्युत कम्पनी रहेका छन् । त्यस्तै, नेपाल एसबिआई बैंक र सिन्धु विकास बैंकको शेयरमूल्य ९ प्रतिशतभन्दा बढी बढेको छ ।  ग्लोबल आइएमई बैंक, किसान लघुवित्त, मल्टीपर्पस फाइनान्स, फस्ट माइक्रोफाइनान्स र सिटिजन्स बैंकको शेयरमूल्य ८ प्रतिशतभन्दा बढी बढेको छ ।

आज कारोबार रकमका आधारमा १४ करोड ७७ लाख रुपैयाँभन्दा बढीको शेयर कारोबार गरेर नेपाल बङ्गलादेश बैंक पहिलो स्थानमा रहेको छ । त्यस्तै, नबिल बैंक, अपि पावर, हिमालयन डिष्टिलरी र अपर तामाकोशीको १० करोडभन्दा बढीको शेयर कारोबार भएको छ ।