सार्वजनिक जग्गा अतिक्रमण गर्ने जो कोही भए पनि कारबाही : अख्तियार प्रमुख राई

अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईले सरकारी, सार्वजनिक जमीन अतिक्रमण गर्ने जोकोहीलाई अनुसन्धान गरेर कारबाहीको दायरमा ल्याउने बताएका छन् ।

अख्तियारको ३०औं स्थापना दिवसको अवसरमा बुधबार आयोजित कार्यक्रममा उनले सरकारी सार्वजनिक जमिन अतिक्रमण गर्ने, खोलाखोल्सा तथा पर्ति जमिन ओगट्ने कार्य सह्य नहुने बताएका हुन् ।

‘सार्वजनिक पदाधिकारी वा उनीहरू जोडिएका जोसुकैलाई अनुसन्धान गर्ने र रोक्ने कार्य आयोगको प्राथमिकतमा रहने छ,’ उनले भने ।

सर्वसाधारण जनताले पाउनुपर्ने स्वास्थ्य सेवा, कृषि सेवा तथा पशु सेवा, कृषि अनुदान र मलखाद, नागरिकता तथा राहदानी, विभिन्न प्रकारका सिफारिस, सवारी चालक अनुमति पत्र, मालपोत तथा जग्गा रजिस्ट्रेसन, श्रमस्वीकृति पत्र लगायतका क्षेत्रमा हुने अनियमितता, घुसखोरी, बिचौलिया धन्दा रोक्न सूक्ष्म निगरानी बढाइने र गलत तथा अनियमितता कार्यलाई कारबाहीको दायरामा ल्याउनेमा आयोगको उच्च प्राथमिकता रहने उनले बताए । 

त्यसका लागि आयोगले द्रुत निगरानी टोली, सूक्ष्म अनुसन्धान टोली आदि खटाउने उनले जानकारी दिए । विकास निर्माणका क्रममा लागत इस्टिमेटमै अनियमितता, बोलपत्र प्रक्रियामा हुने मिलेमतो, गुणस्तरहीन निर्माण कार्य, काम सम्पन्न नगरी हुने भुक्तानी, एउटै काममा दोहोरो तेहोरो खर्च लेख्ने प्रवृत्तिविरुद्ध आयोगले प्राथमिकताका साथ काम गर्ने उनले जनाए ।   

यस्तै, औषधिलगायतमा भएका भ्रष्टाचार सम्बन्धी थुप्रै उजुरी आयोगमा दर्ता भएको र त्यसलाई प्राथमिकता दिएर घुसखोरी र विचौलियालाई निगरानी गर्न विशेष टोली खटाइने उनले जानकारी दिए ।