विभाजनको डिलमा जसपा, जसले कोर्दै छ ओली सरकारको भविष्य

गत २७ वैशाखमा प्रधानमन्त्री केपी शर्मा ओलीले संसदमा विश्वासको मत लिँदै थिए । त्यसक्रममा सरकार टिकाउनका लागि निर्णायक मानिएको जनता समाजवादी पार्टी भने दुई धारमा विभाजित थियो । 

जसपाका अध्यक्ष उपेन्द्र यादव र नेता डा. बाबुराम भट्टराई पक्षले प्रधानमन्त्री ओलीको विपक्षमा मतदान गरे भने जसपाका अर्का अध्यक्ष महन्थ ठाकुर र नेता राजेन्द्र महतो पक्ष भने तटस्थ रहे । उनीहरुले आफूहरुको माग सम्पूर्ण रुपमा पूरा नभइसकेको भन्दै सरकारलाई समर्थन पनि नगरेको र विरोध पनि नगरेको जनाए । 

त्यसक्रममा जसपामा वैचारिक मतभिन्नता भए पनि नेतामा तिक्तता भने थिएन । तर, पछिल्लो केही दिनयताको परिदृश्यले भने जसपा विभाजनको डिलमा पुगेको छ । यसको मुख्य कारण हो, ठाकुर पक्षले राजेन्द्र महतोलाई एकलौटी निर्णबाट संसदीय दलको नेता बनाउनु । 

यो निर्णयबाट आक्रोशित यादव पक्षले भने ठाकुर पक्षलाई अनुशासनको कारबाही हुनेसम्म जनाएको छ । साथै दुवै पक्षबाट वक्तव्यबाजी पनि हुन थालेको छ । 

शनिबार यादव पक्षले आफू निकट कार्यकारिणी सदस्यहरुलाई बैठकका लागि पार्टी कार्यालयमा बोलाएको थियो । लगत्तै ठाकुर पक्षले विज्ञप्ति जारी गर्दै जसपाको केन्द्रीय कार्यकारिणी समितिको कुनै बैठक नडाकिएको र त्यस्तो जानकारी समेत नभएको जनाए । 

जसपाको विभाजनको अवस्थाले भने प्रधानमन्त्री ओली नेतृत्वको सरकारलाई भने प्रभावित पार्नेछ । किनभने ओली सरकारले गठनको ३० दिनमा विश्वासको मत लिनुपर्नेछ । यसअघि ओलीले विश्वासको मत लिँदा जसपाका दुवै पक्षमा १५/१५ जना सांसद देखिएका थिए । दुई जना अनुपस्थित थिए ।  

जसपा विभाजन भएको अवस्थामा ठाकुर पक्षले ओली सरकारलाई सघाउने निश्चित छ । एमाले हाल एकजुट हुँदै गरेको अवस्थामा ठाकुर पक्षले पनि सहयोग गर्दा ओली सरकारले विश्वासको मत पाउने निश्चित हुनेछ । 

यसअघि ठाकुरले ओली सरकारलाई सघाउने संकेत पनि गरेका छन् । गठबन्धन सरकारका लागि राष्ट्रपतिले दिएको समयसीमाको अन्तिम दिन गत बिहीबार ठाकुर पक्षले आफ्ना सांसदलाई भक्तपुरको डोलेश्वरस्थित एक रिसोर्टमा राखेको थियो । 

बहुमत सांसदको हस्ताक्ष नपुगेपछि गठबन्धन सरकारका लागि तम्सिएका नेपाली कांग्रेस र नेकपा माओवादी केन्द्र पछाडि हटेका थिए भने राष्ट्रपतिले फेरि प्रधानमन्त्रीमा ओलीलाई नियुक्त गरेकी थिइन् । 

यदि जसपामा विभाजन नभएमा र विश्वासको मत लिने क्रममा ठाकुर पक्ष फेरि तटस्थ रहेमा भने वर्तमान सरकारलाई अप्ठ्यारोमा पर्नेछ । अन्य दलले सहयोग नगरेको अवस्थामा ओली सरकार हट्नेछ भने मुलुक मध्यवधि चुनावतर्फ लाग्नेछ । 

यादव पक्षका सांसद रामबाबु यादवले महन्थ–राजेन्द्र पक्षले पार्टीको विधान विपरीत राजेन्द्र महतोलाई पार्टी संसदीय दलको नेता घोषणा गरेको भन्दै कारबाही गरिने बताएका छन् ।

शनिबार पार्टी केन्द्रीय कार्यालयमा सञ्चारकर्मीलाई संक्षिप्त प्रतिक्रिया दिर्दै सांसद यादवले पार्टीको संसदीय दलको विधान नबनेको र विधान बनेपछि कार्यकारिणी समितिबाट अनुमोदन हुनुपर्ने भए पनि महतोलाई संसदीय दलको नेता विधान विपरित बनाइएको बताए । 

‘अहिले हाम्रो संसदीय दलको न विधान बनेको छ, र त्यो विधान बनेपछि पार्टीको कार्यकारिणी समितिबाट अनुमोदित हुनुपर्छ । संसदीय दलबाट पास भएर कार्यकारिणी समितिले अनुमोदन नगरेसम्म संसदीय दलको नेता बन्ने हुँदैन,’ उनले भने ।

सांसद यादवले महन्थ–राजेन्द्र पक्षले आफूहरुलाई विधानभन्दा माथि बुझ्ने गरेको पनि बताए । संसदीय दलको नेता चयनको अनैतिक र गलत काम गरी प्रचार गरिएको भन्दै उनले विधान विपरीत गर्नेलाई कारबाही गरिने पनि बताए ।