एयरपोर्टबाट समातियो साढे १५ लाखका अवैध मोबाइल र लत्ताकपडा

काठमाडौं । त्रिभुवन अन्तर्राष्ट्रिय विमानस्थलबाट भन्सार छली गरी ल्याएका सामानहरुसहित मंगलबार एक जना पक्राउ परेका छन् । पक्राउ पर्नेमा काठमाडौं–२३, कालीमाटी घर भएका विपिन मानन्धर रहेका छन् ।

मानन्धरले नेपाल एयरलाइन्सको उडान नं. आरए ४१० द्वारा हङकङबाट काठमाडौं आएका विभिन्न यात्रुहरुलाई भन्सार छली गर्न लगाई अन्दाजी रु. १५ लाख ७५ हजार बराबरको सामान ल्याएका थिए । 

विमानस्थलको अन्तर्राष्ट्रिय आगमनतर्फको नयाँ पार्किङ एरियामा आई उनले सामान संकलन गर्दै गर्दा पक्राउ गरिएको अन्तर्राष्ट्रिय विमानस्थल सुरक्षा कार्यालयका प्रमुख एसएसपी राजेशनाथ बास्तोलाले बताए । 

मानन्धरको साथबाट विभिन्न कम्पनीका १३ थान मोबाइल, रेडिमेट कपडा (ज्याकेट, स्वीटर, सर्ट, पाइन्ट), मनि पर्स, कस्मेटिक सामानहरु बरामद भएको छ । बरामद सामान र पक्राउ परेका व्यक्तिलाई आवश्यक कारवाहीको लागि त्रिभुवन विमानस्थल भन्सार कार्यालय, गौचरण पठाइएको प्रहरीले जनाएको छ ।