पाकिस्तानी दूतावासद्वारा निःशुल्क चिकित्सा शिविर आयोजना

पाकिस्तानी राजदूतावासले नेपाल–पाकिस्तान मैत्री तथा सांस्कृतिक संघ (एनपीएफसीए) को सहकार्यमा आज काठमाडौंको जनप्रभात उच्च माध्यमिक विद्यालय वडा नं १३ कालीमाटीमा निःशुल्क चिकित्सा शिविर आयोजना गरेको छ । यो निःशुल्क चिकित्सा शिविरको १६ औं संस्करण थियो ।

निशुल्क चिकित्सा शिविरको उद्घाटन नेपालका उपप्रधानमन्त्री माननीय सीपी मैनाली, नेपालका लागि पाकिस्तानका राजदूत सैयद हैदर शाह, काठमाडौं महानगरपालिकाकी उपमेयर श्रीमती हरिप्रभा खड्गी (श्रेष्ठ) ले संयुक्त रुपमा गरेका थिए ।

नेपाली डाक्टर र प्यारा–मेडिकल स्टाफ (जसले पाकिस्तानको विभिन्न मेडिकल इन्ट्युशनबाट स्नातक गरेका थिए) निःशुल्क सेवाहरू प्रदान गरेका थिए ।

चार सयभन्दा बढी पुरुष, महिला र बालबालिकालाई निःशुल्क उपचार र तीन महिनाको औषधि वितरण गरिएको थियो । बिरामीहरूलाई कोभिड–१९ विरुद्धको रोकथामका उपायहरूबारे जानकारी गराइएको थियो ।

राजदूत शाहले जनप्रभात उच्च माध्यमिक विद्यालयका लागि उपमेयर खड्गीलाई फोटोकपी मेसिन उपहार पनि हस्तान्तरण गरे । उपमेयर खड्गीले काठमाडौं महानगरपालिकामा निःशुल्क स्वास्थ्य शिविर आयोजना गरी विपन्न नागरिकलाई स्वास्थ्य सेवा उपलब्ध गराएकोमा पाकिस्तानी राजदूतावास र एनपीएफसीएलाई धन्यवाद ज्ञापन गरिन् । 

नेता मैनालीले नेपाल र पाकिस्तानबीचको गहिरो र सौहार्दपूर्ण सम्बन्धको स्मरण गर्दै निःशुल्क चिकित्सा शिविर आयोजना गरेकोमा पाकिस्तानी राजदूतावास र एनपीएफसीएलाई धन्यवाद दिँदै दुई देशबीच सहयोगको निरन्तरताको कामना व्यक्त गरे । 

राजदूत शाहले निःशुल्क चिकित्सा शिविर नेपाल र पाकिस्तानबीचको जनस्तरको सम्बन्धको झल्को रहेको बताए । राजदूत शाहले आगामी दिनमा पनि यस्ता स्वास्थ्य शिविरका लागि पाकिस्तानले निरन्तर सहयोग गर्ने बताए ।