विवादबीच प्रधानन्यायाधीशले बोलाए न्याय सेवा आयोगको बैठक

प्रधानन्यायाधीश चोलेन्द्रशमशेर जबराले बुधबार न्याय सेवा आयोगको बैठक बोलाएका छन् । सर्वोच्च अदालतमा कानुन व्यवसायीहरुको आन्दोलनका बीच जबराले आयोगको बैठक बोलाएका हुन् । 

हाल सर्वोच्च अदालतमा प्रधानन्यायाधीश जबराको नै राजीनामा माग गर्दै कानुन व्यवसायीहरुको आन्दोलन चलिरहेका बेला आयोगको बैठक आह्वानलाई महत्वका साथ हेरिएको छ । कानुन व्यवसायीहरुले सत्ताधारी दलका प्रमुख नेताहरु तथा विपक्षी दलका नेतालाई समेत भेटी प्रधानन्यायाधीश जबराविरुद्ध कदम चाल्न आग्रह गर्दै आएका छन् ।

आयोगको अध्यक्ष प्रधानन्यायाधीश रहने व्यवस्था छ । यस्तै, वरिष्ठतम् न्यायाधीश (दीपककुमार कार्की), कानुन न्याय तथा संसदीय मामिलामन्त्री (दिलेन्द्र बडू), महान्यायाधिवक्ता (खम्मबहादुर खाती) र लोकसेवा आयोगका अध्यक्ष (माधवप्रसाद रेग्मी) आयोगको सदस्य छन् । 

यसबीचमा आह्वान गरिएको आयोगको बैठकमा हाल गठबन्धन सरकारका संसदीय मामिलामन्त्री बडू र महान्यायाधिवक्ता खाती सहभागी हुन्छन् कि हुँदैनन् भन्ने प्रश्न छ । 

यस्तै, जबराको बहिर्गमनका लागि इजलास बहिष्कारको नेतृत्व गरेका वरिष्ठतम् न्यायाधीश दीपक कार्की भने उपस्थित नहुने जस्तै निश्चित छ । यस्तो अवस्थामा बैठक कोरम नपुगेर स्थगित हुने सम्भावना रहेको सर्वोच्च अदालत स्रोतको भनाइ छ ।