ललितपुरको सगरमाथा अक्सिजन ग्यास प्लान्टमा कसरी भयो विस्फोट ?

सगरमाथा अक्सिजन ग्यास प्लान्टमा बिस्फोट हुँदा २ जनाको ज्यान गएको छ भने ६ जना घाइते भएका छन् । 

बिहीबार ललितपुर महानगरपालिका–१५ मा रहेको औद्योगिक क्षेत्रस्थित बिहान १०ः०५ बजे सगरमाथा अक्सिजन नेपाल प्रा.लि.मा अक्सिजन सिलिण्डर भर्ने क्रममा ग्यास लिक भइै पड्किँदा ब्रिजमोहन महतोको ज्यान गएको थियो । एक गम्भीर घाइते र अन्य ६ जना घाइते भएका थिए । 

मृतक ब्रिजमोहन महतोको शरीर क्षतविक्षत भएको ललितपुर प्रहरी परिसर प्रवक्ता एसपी सिद्धिविक्रम शाहले बताए । मृतक महतो भारतको पश्चिम चम्मापर जिल्लाको रतनपुरुवा गाउँका बासिन्दा हुन् । भारत घर भएकै गम्भीर घाइते राजकुमार महतोको पनि उपचारको क्रममा मृत्यु भएको शाहले जनाए ।

राजकुमारको बिएण्डबी अस्पतालमा उपचार भइरहेको थियो । अन्य घाइते पाटन अस्पतालमा उपचारपछि डिस्चार्ज भएका छन् । अन्य घाइतेमा पर्सा घर भएका रमेश अधिकारी, ललितपुरकी दुर्गा पुरी, सुदीप तिमिल्सेना, ईश्वर बजगाईं, ओखलढुंगाकी अन्जना पौडेल, काठमाडौंका गंगाराज शर्मा छन् ।  

अहिले घटनास्थलमा नेपाल प्रहरीको विपद् व्यवस्थापन टिमले सुरुवाती अनुसन्धान गरिरहेको र सुरुवाती अनुसन्धानपछि यसको विस्तृत अनुसन्धान हुने एसपी शाहले बताए ।

‘अक्सिजन रिफिलको काममा बिस्फोट भएको देखिन्छ । घरहरुमा क्षति भएको छ, सिसा फुटेको छ । मृतकका पार्टहरु धेरै टाढा टाढासम्म पुगेको छ, यो टेक्निीकल्ली कारण हो । अब अनुसन्धानपछि सबै थाहा हुन्छ । विस्फोट भएका कारण घटना भएको हो । आगलागी भएको छैन । क्षति अहिले नै यकिन गर्न सकिँदैन । कति भयो अनुसन्धानपछि थाहा हुन्छ । रिफिलिङगको क्रममा टेक्निकल्ली मिस्टेक भएर बिस्फोट भयो प्लान्टमा नै क्षति पुगेको छ । छिमेकको घरहरुमा पनि सिसा फुटेको छ,’ उनले भने ।

त्यस्तै दुर्घटनास्थलको निरीक्षणका लागि पुगेका उद्योग, वाणिज्य तथा आपूर्ति मन्त्री दिलेन्द्रप्रसाद बडूले मृतकको परिवारले पाउने राहत सरकारले तत्काल दिने बताए । उनले अन्य घाइतेलाई सरकारले उपचार गर्ने पनि प्रतिबद्धता जनाए ।