अफगानिस्तानको संकटबारे छलफल गर्न पाकिस्तानमा मुस्लिम देशहरुको सम्मेलन सुरु

अफगानिस्तानको मानवीय संकट र ओरालो लागिरहेको अर्थव्यवस्थालाई लिएर पाकिस्तानको इस्लामावादमा मुस्लिम देशहरुको सम्मेलन सुरु भएको छ । अर्गनाइजेसन अफ इस्लामिक कोअपरेसन (ओआईसी) को ५७ देशहरु, पश्चिमा देशहरु र अन्तर्राष्ट्रिय एजेन्सीका प्रतिनिधि यस सम्मेलनमा सहभागी छन् । 

ओआईसीको विदेशमन्त्रीहरुको काउन्सिलको १७ औं विशेष सम्मेलनको उद्घाटनमा पाकिस्तानले ६ सूत्रीय रणनीति पेस गरेको छ । उद्घाटनमा पाकिस्तानका विदेशमन्त्री शाह महमूद कुरेसीले अफगानिस्तानको आर्थिक समर्थनमा प्रस्ताव पेस गरेका हुन् । 

उनले उद्घाटनको क्रममा अफगानिस्तानमा मावीय संकट र आर्थिक सहायता दिन ओआईसी देशहरुको ऐक्यबद्धता हुनुपर्नेमा जोड दिए । पाकिस्तानको संसदमा जारी यो सम्मेलनमा मुस्लिमका देशका २० विदेशमन्त्री, १० उपविदेशमन्त्रीका साथै ७० प्रतिनिधिमण्डल सहभागी छन् ।

यस बैठकको मुख्य उद्देश्य अफगानिस्तानको मानवीय स्थितिबारे चर्चा गर्नु हो । अफगानिस्तानको विषयमा विश्वव्यापी रुपमा बढ्दै गएको चिन्ताको दृष्टिकोणले यो सम्मेलन महत्वपूर्ण मानिएको छ । 

पाकिस्तानका प्रधानमन्त्री इमरान खानले आइतबार अफगानिस्तान ‘विश्वमा मानवनिर्मित सबैभन्दा ठूलो मानव संकट’ हुनसक्ने भन्दै विश्वसमुदायलाई चेतावनी दिएका थिए । त्यसैले अब यस विषयमा तत्काल काम गर्नुपर्ने उनको भनाइ थियो।