भारतले युद्ध सैनिकका लागि ल्यायो नयाँ पोशाक, यस्ता छन् विशेषता

भारतीय स्थल सेनाका प्रमुख जनरल एमएम नरवणेले सेना दिवसको अवसरमा शनिबार भारतीय सेनाको नयाँ पोशाक उद्घाटन गरेका छन् । नयाँ पोशाक १२ लाख सैनिकहरुलाई चरणबद्ध रुपमा उपलब्ध गराइने भारतीय सेनाले जनाएको छ । 

सेनाका सबै पोशाकमा परिवर्तन गरिएको होइन । हाल युद्धको दौरानमा जाने पोशाकमा मात्र परिवर्तन गरिएको हो ।

भारतीय सञ्चारमाध्यम इन्डियन एक्सप्रेसका अनुसार सेनाको पुरानो पोशाक २००८ देखि प्रयोग हुँदै आएको थियो । नयाँ पोशाकको आवरणमा परिवर्तन र नयाँ कपडाको प्रयोग गरिएको छ । नयाँ पोशाकमा पुरानै रंगको प्रयोग रहे पनि डिजिटल रहेको जनाइएको छ । मरुभूमि, पहाडी क्षेत्र, जंगल, समथर क्षेत्रलाई ध्यानमा राखेर पोशाक बनाइएको हो । 

नयाँ पोशाक हल्का, बलियो, सहज र सैनिकका पोस्टिङ अनुसार विभिन्न क्षेत्रका लागि उपयुक्त हुने भारतीय सञ्चारमाध्यमले जनाएका छन् । यसमा सुती र पोलिस्टरको अनुपात ७० र ३० प्रतिशत  छ । नयाँ पोशाक चाँडै सुक्ने जनाइएको छ ।

सेनाका अनुसार पुरानाको तुलनामा नयाँ पोशाक १५ प्रतिशत हल्का र फाट्ने मामिलामा २३ प्रतिशत बलियो रहेको छ । महिलालाई पनि ध्यानमा यो पोशाक बनाइएको छ । भारतकै नेशनल इन्स्टिच्यूट अफ फेसन टेक्नोलोजीका १२ जनाको समूहले पोशाक बनाएको हो । बीबीसी हिन्दीबाट