परराष्ट्र मन्त्रालयकी सहसचिव सेवा लम्सालको नेतृत्वमा सहायता सामग्री लिएर नेपाली टोली अफगानिस्तान प्रस्थान

अफगानिस्तानी जनताका लागि सहायता सामग्री बोकेर नेपाली टोली अफगानिस्तान प्रस्थान गरेको छ । आइतबार परराष्ट्र मन्त्रालयकी सहसचिव सेवा लम्सालको नेतृत्वमा अफगानिस्तानी जनतालाई आवश्यक औषधी, घरायसी सामग्रीहरु र लत्ता कपडा बोकेर नेपाली टोली अफगानिस्तान प्रस्थान गरेको हो । 

अफगानिस्तानमा गत अगष्टमा तालिवानले आफ्नो हातमा सत्ता लिएपछि त्यहाँ आर्थिक तथा मानविय संकट उत्पन्न भएको छ । अफगानिस्तानमा हाल खाद्यान्नको अभाव हुनुका साथै लाखौँ बालबालिकालाई कुषोषण हुन थालेको छ । संयुक्त राष्ट्रसंघले नेपाल सरकारलाई अफगानिस्तानमा सहायता सामग्री पठाउन अनुरोध गरेसँगै नेपालमा नेपाल उद्योग वाणिज्य महासंघ, नेपाल चेम्बर अफ कमर्श र नेपाल उद्योग परिसंघ लगायतका निजी क्षेत्रहरुको अग्रसरतामा सहायता सामग्री पठाइएको हो । 

टोलीमा सरकारी अधिकारी, निजी क्षेत्रका प्रतिनिधिका साथै पत्रकारहरु समेतको सहभागिता रहेको छ । टोली अफगानिस्तान प्रस्थान गर्नुअघि त्रिभुवन अन्तर्राष्ट्रिय विमानस्थलमा पत्रकार सम्मेलनमा बोल्दै परराष्ट्र मन्त्री डा. नारायण खड्काले संयुक्त राष्ट्रसंघले दिएको सूची अनुसार औषधी, घरायसी सामग्री र लत्ता कपडाहरु लिएर नेपाली टोली जाँदै गरेको बताए । करिब १४ टन बराबर सामान रहेको उनले जानकारी दिए । उनले भने, ‘झन्डै १४ टन सामान जस्तो लाग्छ हामीलाई मोटामोटी । यसमा संयुक्त राष्ट्रसंघले दिएको लिष्ट जहाँ औषधी उपचारको लागि औषधीमुलो र साथसाथै घरायसी सामानहरु र लत्ता कपडाहरु यि तिन क्याटेगोरीका सामानहरु हामीलाई संयुक्त राष्ट्रसंघले यस अनुसार प्रदान गर्नका लागि अनुरोध गरेको थियो । त्यस अनुसार सामानहरु लादै छौँ ।’

परराष्ट्र मन्त्री खड्काले विश्वका जुनकुनै कुनामा रहेका जनताहरुलाई अप्ठ्यारो पर्दा नेपालले मानविय सहयोग पु¥याउन सामथ्र्य राख्ने बताए । अफगानिस्तानी जनतालाई सहयोग गरेसँगै नेपालको छवि र प्रतिष्ठा अन्तर्राष्ट्रिय जगतमा बढ्ने विश्वास उनले  व्यक्त गरे । उनले भने, ‘हामी अब विश्व समुदायलाई देखाउने सामथ्र्य पनि छौँ । हामीसँग त्यो क्षमता छ । र हामीहरु पनि विश्वका जनताहरु जहाँसुकै , कुनै कुनामा भएपनि संकटमा पर्दाखेरी मानविय सहयोग पु¥याउनका लागि त्यो सामथ्र्य नेपालले राख्छ भन्ने एउटा उदाहरण पेश गर्नका लागि पनि आजको यो प्रयास हो । यसले नेपालको छवि र प्रतिष्ठालाई पनि अन्तर्राष्ट्रिय जगतमा बढाउने छ भन्ने मैले विश्वास लिएको छु । यो ऐतिहासिक प्रयास पनि हो ।’

नेपाली टोली हिमालय एयरलाइन्सको जहाजबाट प्रस्थान गरेको हो । सहायता सामग्री काबुलस्थित संयुक्त राष्ट्रसंघको प्रतिनिधिलाई हस्तान्तरण गरेसँगै टोली आइतबार (आजै) नै स्वदेश फर्किने कार्यक्रम रहेको परराष्ट्र मन्त्रालयले जनाएको छ ।