महोत्तरीको जलेश्वर नगरपालिका–९ प्रकौलीमा रहेको नेपाली सेनाको रणभीम गणमा बुुधबार बिहान नेपाली सेनाका एक सिपालीले आफैँलाई गोली हानी आत्महत्या गरेका छन् ।
जिल्ला प्रहरी कार्यालय महोत्तरीका प्रवक्ता डीएसपी प्रकाश विष्टका अनुसार मृत्युु हुने नेपाली सेनाका सिपाही अम्बिर तामाङ हुन् । रामेछापको लिखु तामाकोशी गाउँपालिका–५ घर भएका तामाङले बुधबार बिहान करिब ६ बजे आफैँलाई गोली हानी आत्महत्या गरेको डीएसपी विष्टले बताए ।
रणभीम गण प्रकौली (ख) गुल्म दरबन्दी भएका तामाङको बुधबार बिहान ३ देखि ५ बजेसम्मको डिउटी थियो । ब्यारेकको अतिथिगृहसँगै रहेको कोतमा डिउटीमा खटिएका उनले अर्का सिपाही हतियार बुझाएर गएपछि एक्लै भएको अवस्थामा आफैलाई गोली हानेको प्रहरीले जनाएको छ ।
तामाङले फाइभ प्वाइन्ट फाइभ मिनी इन्सास राइएफलले आफ्नै बाँया कन्चटमा गोली हानेका थिए । उनको घटनास्थलमै मृत्यु भएको हो ।
सिपाही तामाङले के–कति कारणले आफैँलाई गोली हाने भन्नेबारे अहिलेसम्म केही खुलेको छैन । उनको मृत शरीर सोही स्थानमा सुरक्षित राखी थप अनुसन्धान तथा सर्जमिन मुचुल्काका लागि जिल्ला प्रहरी कार्यालय महोत्तरीबाट प्रहरी निरीक्षकको कमाण्डमा टोली खटिएको छ ।
© न्युज सोसाइटी प्रा.लि.मा सर्वाधिकार सुरक्षित- 2022,
Powered by: Nectar Digit