१९ वर्षीय युवाले गरे फुडमाण्डुमा साइबर हमला

पर्दाफास रिपोर्टर
मङ्सिर २५, २०७७

काठमाडौं उपत्यकाको लोकप्रिय अनलाइन रेडिमेड फुड सप्लायर्स फुडमाण्डुमा साइबर आक्रमण भएको छ ।

एकजना १९ वर्षीय युवाले फुडमाण्डुको सूचना प्रणालीमा अनधिकृत पहुँच बनाई ग्राहकहरुको तथ्याँक सार्वजनिक गरेका हुन् ।

साइबर ब्यूरोले संचालन गरिरहेको अप्रेशन ह्याक्र हन्ट अन्तर्गत नवलपरासी पश्चिम सुनवल नगरपालिका घरभई हाल काठमाण्डौ रानीबारीमा बस्ने दिनेश तिवारीलाई पक्राउ गरेको हो ।

उनले फुडमाण्डुको वेबसाइट मार्फत मुख्य सर्वरमा पहुँच पुर्याएर त्यहाँ रहेका ग्राहकहरुको विवरण चोरेका थिए ।

ब्यूरो प्रमुख एसएसपी नविन्द अर्यालले तिवारीले निजी क्षेत्रको अनलाइन बिजनेशमा रहेको डाटाबेश ब्रिच गरी अनधिकृत रूपमा पहुँच पुर्र्याएर सार्वजनिक गरेको बताए ।

तिवारी बिरुद्ध विद्युतीय (ईलेक्ट्रोनिक) कारोवार ऐन, २०६३ को परिच्छेद–९ बमोजिमको कसुर अनुसार अदालतबाट म्याद लिएर कारबाही भइरहेको ब्यूरोले जनाएको छ।