बीपी र पुष्पलालको सालिकबारे एमाले र गठबन्धनको विवादले सिन्धुलीमा कर्फ्यु

बीपी कोइराला र पुष्पलाल श्रेष्ठको सालिक अनावरण गर्ने विषयमा विवाद हुँदा सिन्धुलीमा निषेधाज्ञा जारी गरिएको छ । सिन्धुलीमाढीको बालउद्यान पार्कभित्रका रहेका यी सालिकको एमाले महासचिव ईश्वर पोखरेल पुगेका थिए । 

तर, नेकपा एमलो र गठबन्धनका दलहरुबीच विवाद र झडप हुने स्थिति देखिएपछि जिल्ला प्रशासन कार्यालयले निषेधाज्ञा जारी गरेको हो । प्रशासनले एक विज्ञप्ति जारी गर्दै बुधबार बिहान ११ बजेदेखि मध्यराति १२ बजेसम्म लागू हुने गरी निषेधाज्ञा लगाइएको जनाएको छ । 

निषेधाज्ञा सिन्धुलीमाढीस्थित बसपार्क क्षेत्र, स्टलबजार, जुनार चोक, सिन्धुली अस्पताल आसपासको क्षेत्रमा जारी गरिएको प्रमुख जिल्ला अधिकारी रमेश न्यौपानेले जानकारी दिए । निषेधाज्ञामा उक्त क्षेत्रमा जुलुस, धर्ना, आमसभालगायत शान्ति सुरक्षामा असर पुग्ने कुनै पनि किसिमका कार्यहरू गर्न पाइने छैन । 

पार्कभित्रको विपी र पुष्पलालको सालिक पोखरेलले गर्ने नगरपालिकाको निर्णयविरुद्ध सत्ता गठबन्धनका दलले विरोध गरेका हुन् । सर्वदलीय निर्णयबाट सालिक अनवारण गर्नुपर्ने उनीहरको माग छ ।

गठबन्धन दलले मंगलबार पार्कमा तालाबन्दीसमेत गरेका थिए । बुधबारको बैठकमा गठबन्धन र एमालेका नेता कार्यकर्ताबीच विवाद भएको थियो । विवाद बढेपछि सो क्षेत्रमा सुरक्षाकर्मी परिचालन गरिएको छ ।