एसिड आक्रमणका पीडितहरुलाई न्याय दिने काममा पनि गठबन्धनको अवरोध : ईश्वर पोखरेल 

नेकपा एमालेका वरिष्ठ उपाध्यक्ष ईश्वर पोखरेलले सत्तारुढ गठबन्धनले एसिड आक्रमणमा संलग्नहरुलाई कारबाही गर्ने कानुन बन्न नदिएको आरोप लगाएका छन् । 

उनले सत्तारुढ गठबन्धनले एसिड आक्रमणका अपराधीहरुलाई कारवाही गर्नका लागि आफ्नो पार्टी नेतृत्वको अघिल्लो सरकारले ल्याएको अध्यादेश संसदबाट पारित गर्न नदिएको आरोप लगाएका छन् । पार्टी निकट विद्यार्थी संगठन अनेरास्ववियु महिला विभागले बुधबार काठमाण्डौमा आयोजना गरेको एक कार्यक्रममा बोल्दै उनले एसिड आक्रमणमा परेका पीडितहरुलाई न्याय दिने काममा समेत सरकारले कानुन बन्न नदिएर अवरोध सृजना गरिरहेको बताएका छन् ।

उनले महिला हिंसा हुन नदिनका लागि विद्यार्थी संगठनहरुले सरकारलाई दबाब दिनुपर्ने आवश्यक्ता समेत औंल्याएका छन् । उनले महिला हिंसा अन्त्यका लागि राजनीतिक अभियान नै संचालन गर्नुपर्ने भन्दै त्यसका लागि अनेरास्ववियुले सामाजिक जागरण अभियान संचालन गर्नुपर्ने बताएका छन् । 

‘एउटै मात्रै म दृष्टान्त दिन्छु–एसिड आक्रमण गर्नेहरुमाथि सजाय गर्नुपर्छ भनेर त्यो एउटा गम्भीर अपराधको रुपमा लिनुपर्छ र दण्डित गर्नुपर्छ भनेर हामीले संसद नचलेको बेला अध्यादेश ल्यायौं । अनि यो गठबन्धनकारीहरुले के ग¥योभन्दा त्यो अध्यादेशलाई प्रस्तुत गर्न समेत दिएन । जसले गर्दा यो एसिड आक्रमणमा परेका पीडितहरुको न्याय पाउने कुरालाई कसरी अवरोध सृजना गरियो । यो त एउटा दृष्टान्त मात्रै हो । यस्ता धेरै कुरा छन नि । त्यसकारणले मैले यहाँहरुलाई के भन्न चाहुन्छु भने–अनेरास्ववियुले यो काम गरिरहँदा मेरो हार्दिक आग्रह छ–यसलाई सामाजिक, राजनीतिक अभियानको रुपमा अघि बढाउनु पर्छ । त्यसका लागि सरकारलाई दवाव दिन सक्नुपर्छ’ उनले भने ।

उनले मुलुकको राजनीतिक परिवर्तनलाई जोगाउन पनि सामाजिक जागरणको अभियानलाई तीव्रता दिएर समाजवादको आधार निर्माण गर्न केन्द्रित हुनुपर्नेमा जोड दिएका छन् ।