भित्रैका मान्छेलाई उक्साएर गठबन्धन कमजोर पार्ने कोसिस भइरहेको छः पौडेल 

नेपाली कांग्रेसका वरिष्ठ नेता रामचन्द्र पौडेलले गठबन्धन भित्रैका मानिसलाई उक्साएर गठबन्धन कमजोर पार्ने कोसिस भइरहेको बताएका छन् । 

शुक्रबार काठमाडौंमा आयोजित पाँच दलीय गठबन्धनको चुनावी सभालाई सम्बोधन गर्दै वरिष्ठ नेता पौडेलले गठबन्धनलाई कमजोर पार्नु अस्थिरतालाई बलियो बनाउनु  भएको बताएका हुन् । 

उनले एमाले अध्यक्ष केपी ओलीले निमित्त नायक भएर मुलुकलाई अस्थिरताको भुमरीमा धकेलेको भन्दै ओलीलाई बलियो बनाउन गठबन्धन कमजोर बनाउने खेल भएको पनि बताए । 

वरिष्ठ नेता पौडेलले प्रतिगामी शक्तिका विरुद्ध प्रगतिशील शक्ति एक हुनुपर्ने बताए । उनले संविधानले नै संयुक्त सरकारको संस्कृति अनिवार्य बनाएको भन्दै बदलिदो व्यवस्था अनुसार आफूलाई परिवर्तन गर्न नेता, कार्यकर्तालाई आग्रह गरे ।

वर्तमान गठबन्धन नेपालको संविधानले नै माग गरेको उनले उल्लेख गरे । उनले विगतको जस्तो पार्टीहरुका बीचमा सिद्धान्तको लडाइँ नभएकाले देशको मूल समस्यालाई हेरेर एक ठाउँमा हुनुपर्ने बताए । 

वरिष्ठ नेता पौडेलले गठबन्धनका उम्मेदवारलाई जिताउनका लागि मतदातालाई भोट हाल्न पनि सिकाउन जरुरी रहेको बताए ।