नेकपा(माओवादी केन्द्र)का अध्यक्ष पुष्पकमल दाहाल प्रचण्डले भरतपुरका कांग्रेस कार्यकर्ताले स्थानीय तह निर्वाचनमा हसियाँ हथौडामा भोट हालेमा गठबन्धन २० वर्षसम्म लैजाने बताएका छन् ।
बिहीवार चितवनको भरतपुरमा सत्तारुढ पाँच दलीय गठबन्धनले आयोजना गरेको आमसभालाई सम्बोधन गर्दै अध्यक्ष दाहालले भोट नहालेमा भने देश दुर्घटनामा जान सक्ने बताए । उनले गठबन्धन राष्ट्रको आवश्यकता भएको उल्लेख गर्दै यसलाई अगाडि बढाउने, नबढाउने फैसलाको अधिकार चितवनबासीको हातमा रहेको बताए ।
अध्यक्ष दाहालले आफूलाई आशंका गरेर गठबन्धन कमजोर पार्न नखोज्न आग्रह पनि गरे । उनले त्यसको जवाफ गठबन्धनको विरोधमा भाषण गरेर हिँड्नेहरुले दिनुपर्ने बताए । उनले
आगामी दिनमा पनि शेरबहादुर देउवालाई अगाडि राखेर अगाडी बढ्न अप्ठ्यारो नमान्ने बताए ।
एमालेका नेताले पुनः मिल्न आग्रह गर्ने गरे पनि आफुले अब सो गल्ती नदोहोर्याउने स्पष्ट पारे ।
उनले चितवनको विकासलाई मोडेल बनाएर नेपालकै विकास गर्ने आफ्नो लक्ष्य रहेको बताए । भरतपुर महानगरपालिकाले गएको पाँच वर्षमा आफ्नो प्रतिवद्धता अनुसारको काम इमान्दारीता साथ गरेको प्रचण्डको भनाइ छ ।
कार्यक्रममा बोल्दै नेकपा(एकीकृत समाजवादी)का अध्यक्ष माधवकुमार नेपालले गठबन्धनलाई नोक्सानी हुनेगरी नलाग्न आग्रह गरेका थिए । उनले गठबन्धनबाट सबै दललाई केही न केही फाइदा पनि भएको र खोजेको जस्तो पनि नभएको बताए ।
© न्युज सोसाइटी प्रा.लि.मा सर्वाधिकार सुरक्षित- 2022,
Powered by: Nectar Digit