अहिलेको अवस्था हेर्दा कर्जाको ब्याजदर अझै बढ्छः गभर्नर अधिकारी 

नेपाल राष्ट्र बैकका गभर्नर महाप्रसाद अधिकारीले अहिलेको अवस्थालाई हेर्ने हो भने आगामी दिनमा कर्जाको ब्याजदर अझै बढ्न सक्ने बताएका छन् ।

बुधबार नेपाल चार्टर्ड एकाउन्टेन्ट संस्थाको पहिलो राष्ट्रिय सम्मेलनमा बोल्दै गभर्नर अधिकारीले बैंकिङ प्रणालीमा तरलता अभावको कारण व्याजदरमा असर परेको बताए । उनले मौद्रिक नीतिको अर्धवार्षिक समीक्षा समेत २ प्रतिशतले रेट बढाएको बताए ।

अधिकारीले व्यापार घाटा बढ्दै गए आयातका नीतिहरुमा सोच्नु पर्ने अवस्था रहेको उल्लेख गरे । अहिले पनि सरकारले केही वस्तुको आयातमा रोक लगाउने नीति प्रयोग गरिरहेको उनको भनाइ छ । सरकारले आयातमा रोक लगाएको नीति सधैँको लागि नभएर छोटो समयको लागि भएको उल्लेख गरे । 

गभर्नर अधिकारीले अर्थतन्त्र रहे मात्रै व्यापारीहरुले व्यापार गर्न पाउने भन्दै केही समय सबैले धैर्य गर्नुपर्ने बताए । उनले  अहिले नै मुलुकको अर्थतन्त्र आत्तिहाल्नु पर्ने अवस्थामा नभएको पनि स्पष्ट पारे । उनले चालु वर्षको मौद्रिक नीतिमार्फत निजी क्षेत्रमा जाने १९ प्रतिशतको कर्जा लक्ष्य पुरा नहुने बताएका छन् ।

अधिकारीले आर्थिक बर्षको सुरुवातमा कर्जा विस्तार ३२ प्रतिशतसम्म पुगेको र बैकिङ प्रणालीमा तरलता अभावका कारण कर्जा विस्तार हुन नसकेको कारण निजी क्षेत्रमा जाने १९ प्रतिशतको कर्जा लक्ष्य पुरा नहुने बताएका हुन् । 

उनले १९ प्रतिशतको कर्जा विस्तारको लक्ष्य पूरा गर्न थप २ खर्ब ऋण बैंकहरुले विस्तार हुनुपर्ने बताए । गभर्नर अधिकारीले बजारमा तरलता अभाव तथा अर्थतन्त्र चुनौती पूर्ण रहेकाले पछिल्लो दुई महिनामा दुई खर्ब लगानी विस्तार हुन नसक्ने स्पष्ट पारे ।