राष्ट्रिय वाणिज्य बैंकका आठ जनाविरुद्ध एक करोड २५ लाख भ्रष्टाचारको मुद्दा

पर्दाफास रिपोर्टर
पुस १५, २०७७

अख्तियार दुरुपयोग अनुसन्धान आयोगले सरकारी कागजात किर्ते गरी कर्जा दुरुपयोग गरेको आरोपमा राष्ट्रिय वाणिज्य बैंक नेपालगन्ज शाखाका कर्मचारीसहित आठ जनाविरुद्ध भ्रष्टाचार मुद्दा दायर गरेको छ ।

धितो मूल्यांककर्ता समेतको मिलेमतोमा उनीहरुले कर्जा दुरुपयोग गरेको अख्तियारको भनाइ छ । अख्तियारले मंगलबार विशेष अदालतमा दायर गरेको मुद्दामा बैंकका तत्कालीन प्रबन्धक ललितबहादुर शाही, सहायक कलबहादुर ओली क्षत्री, उपप्रमुख होताराम योगी, सहायक प्रिन्सी गुप्ताविरुद्ध एक करोड २५ लाख रुपैयाँ बिगो मागदाबी गरिएको छ ।

उनीहरूमाथि किर्ते कागजातको मूल्यांकन गरी ऋण प्रवाह गरेको आरोप छ । धितो मूल्यांकनकर्ता कर्णबहादुर केकेमाथि एक करोड २५ लाख बिगो मागदाबी गर्दै मुद्दा दायर गरिएको अख्यितारका प्रवक्ता तारानाथ अधिकारीले जनाए ।

यस्तै, ऋण लिने रिजवान अहमत जसगढ, सकिना जसगढ र फहमिदा बानो जसगढविरुद्ध ७५ लाखदेखि एक करोड २५ लाख रुपैयाँ बिगो मागदाबी गरिएको छ ।