सुधीर बस्नेतका पक्षमा सर्वोच्चको अन्तरिम आदेश

सर्वोच्च अदालतले ठगीको आरोपमा पटक–पटक पक्राउ पर्दै आएका सुधीर बस्नेतका पक्षमा अन्तरिम आदेश जारी गरेको छ । 

बैंकले लिलामी सकारेको २४ रोपनी जग्गा लिन उनले सर्वोच्चमा ५ मंसिरमा परमादेश सहितको आदेश मागगर्दै रिट निवेदन दर्ता गराएका थिए ।

सर्वोच्चका न्यायाधीश पुुरुषोत्तम भण्डारीले मंगलबार रिटको सुनवाई गर्दै अन्तरिम आदेश जारी हुने आदेश गरेका हुन् । 

बैंकले लिलामी सकारेको २४ रोपनी जग्गा फिर्ता लिन बस्नेत मुख्य सञ्चालक रहेको ओरियन्टल बिल्डर्सका तर्फबाट बस्नेत अदालत पुुगेका थिए । 

काठमाडौंको धापासीमा रहेको २४ रोपनी जग्गा आफ्नो कम्पनीको नाममा फिर्ता पाँउन पमादेशको माग बस्नेतले गरेका थिए ।

८ वर्षअघि २४ करोड रूपैयाँ ऋण तिर्न नसकेपछि एनआइसी एसिया बैंकले लिलामी निकालेको थियो। बस्नेतले तत्कालीन बैंक अफ एसियाबाट ऋण निकालेका थिए जुन बैंक पछि एनआइसी भएको हो ।  

लिलामीमा पनि नबिकेपछि बैंकले जग्गा आफ्नो नाममा सकारेको थियो। लिलामी प्रक्रियादेखि आफूहरूले सकारेको सबै जानकारी राष्ट्र बैंकलाई गराएको एनआइसी एसिया बैंकले जनाएको छ । 

बस्नेतले ऋण नतिरी वेवास्ता गरेकाले बैंक तथा वित्तीय संस्था ऐन २०६३, दफा ५७९ ६ बमोजिम बैंकले उक्त धितो सम्पत्ति २०६९ सालमा आफ्नो नाममा सकारेको जानकारी बैंकले दिएको  छ  ।

यस जग्गा सम्बन्धी मुद्दामा जिल्ला र पुनरावेदन अदालतले बैंकको पक्षमा निर्णय सुनाएको थियो ।