व्यापारिक सहकार्यबारे पाकिस्तानका व्यवसायीसँग राजदूत अधिकारीको छलफल

पाकिस्तानका लागि नेपाली राजदूत तापस अधिकारीले सोमबार पाकिस्तानको रावलपिन्डी चेम्बर अफ कमर्श एन्ड इन्डस्ट्री (आरसीसीआई) का सदस्यहरुसँग भेटघाट गरेका छन् । सो क्रममा उनले चेम्बरका अध्यक्ष मोहम्मद नासिर मिर्जालगायत सदस्यसँग छलफल गरेका थिए ।

सो अवसरमा द्विदेशीय व्यापार र उद्योगका क्षेत्रमा सहकार्यबारे छलफल भएको राजदूत अधिकारीले जनाएका छन् । नेपाल र पाकिस्तानबीच पर्यटन क्षेत्रमा सहयोग बढाउनुपर्ने आवश्यकताबारे पनि सो भेटघाटमा चर्चा भएको थियो । 

राजदूत अधिकारीले आरसीसीआईका सदस्यहरुलाई व्यवसाय तथा लगानीको अवसरका लागि नेपाल भ्रमणको निमन्त्रणासमेत दिएका थिए । उनले व्यापार, पर्यटन, कृषि लगाइ क्षेत्रमा सहकार्यका लागि नेपाल र पाकिस्तानबीच सीधा हवाई सेवा सञ्चालन गर्नुपर्नेमा जोड दिँदै आएका छन् ।