राजदूत अधिकारीले बुझाए इरानका राष्ट्रपतिलाई ओहोदाको प्रमाणपत्र

पर्दाफास रिपोर्टर
ब‌ैशाख १३, २०७९

पाकिस्तानका लागि नेपाली राजदूत तापस अधिकारीले इस्लामिक गणतन्त्र इरानका राष्ट्रपति आयतोल्लाह सैयद इब्राहिम राईसीलाई गैरआवासीय राजदूतको ओहोदाको पत्र बुझाएका छन् ।

इरानको राष्ट्रपति भवन तेहरानमा सोमबार आयोजित विशेष समारोहबीच राजदूत अधिकारीले पत्र बुझाएका हुन् । सो क्रममा राजदूत अधिकारीले राष्ट्रपति विद्यादेवी भण्डारी र प्रधानमन्त्री शेरबहादुर देउवाका तर्फबाट शुभकामना व्यक्त गरेका थिए ।

इरानका राष्ट्रपतिले पनि नेपाली जनताको व्यक्तिगत स्वास्थ्य र सुख शान्तिको कामना गरेका थिए ।

राजदूत अधिकारीले नेपाल र इरानबीचको द्विपक्षीय सम्बन्ध सधैं आपसी विश्वास र सहयोगमा आधारित रहेको बताए । उनले नेपाल र इरान असंलग्न आन्दोलन, समूह ७७, संयुक्त राष्ट्र संघलगायत अन्य महत्वपूर्ण अन्तर्राष्ट्रिय मञ्चमा साझा सरोकारका विभिन्न विषयमा मिलेर काम गरिरहेको बताए ।

राजदूत अधिकारीले नेपाल र इरानबीचको द्विपक्षीय सम्बन्धलाई अझ प्रगाढ बनाउन आफूले इमानदार प्रयास गर्ने बताए ।