कडा सुरक्षा र सीसीटिभी निगरानीकाबीच कसरी भयो विमानस्थलको कार्गोबाट १३ थान ल्यापटप चोरी?

नेपाल पारवहन तथा गोदाम व्यवस्था कम्पनी लिमिटेड त्रिभुवन अन्तराष्ट्रिय विमानस्थल शाखा कार्यालयले सञ्चालनमा ल्याएको कार्गो कम्प्लेसबाट १३ थान ल्यापटप चोरी भएको घटना सार्वजनिक भएको छ । 

लिमिटेडको आयात गोदामबाट गत जेठ ०७ र ११ गते आयात भएको ५०७ पिस ल्यापटपमध्ये जेठ २० गते मध्यरातको समयमा ७ पिस र  असार ३ राती  ६ पिस गरि जम्मा १३ थान ल्यापटप चोरी भएको थियो। 

ल्यापटप चोरी भएपछि नेपाल पारवहन तथा गोदाम व्यवस्था कम्पनी लिमिटेडले महानगरीय अपराध महाशाखामा निवेदन दिएको थियो ।

महानगरीय विमानस्थल सुरक्षा कार्यालयसँगको समन्वयमा अनुसन्धान  गर्ने क्रममा उक्त चोरी कार्यमा संलग्न सिन्धुपाल्चोकका विष्णु अधिकारीलाई प्रहरीले पक्राउ गरेको छ । 

अधिकारीलाई चोरी गरि लगेको ल्यापटप सहित पक्राउ गरि चोरी सम्बन्धी कसुरमा  थप अनुसन्धानका लागि महानगरीय प्रहरी  परिसर काठमाडौंमा पठाइएको छ । 

विमानस्थल सुरक्षा कार्यालयका एसएसपी राजेशनाथ बाँस्तोलाका अनुसार नयाँ नेपाल जनशक्ति सर्भिस प्रालिको तर्फबाट कार्गो कम्प्लेक्सको निर्यात गोदाममा अधिकारी लोडरको काम गर्थे। 

राति आयात तर्फको गोदामबाट ल्यापटप चोरेर फोहोरमा लुकाउने गरेको र दिउँसो डेरामा लैजाने गरेको भेटिएको बाँस्तोलाले बताए।