कपिलवस्तु प्रहरीले भन्सार छली ल्याएको चिनीसहित चार जनालाई पक्राउ गरेको छ । कपिलवस्तु नगरपालिका–११ जहदी बस्ने २५ वर्षीय पंकज गुप्ता, ३६ वर्षीय जवाहर गुप्ता, वाणगंगा नगरपालिका–११ का २८ वर्षीय हीराबहादुर चौधरी र अर्घाखाँची पाणेनी गाउँपालिका–७ का ५५ वर्षीय देवीप्रसाद खनाललाई पक्राउ गरिएको हो ।
गुप्ताद्वय कारोबारी हुन् भने चौधरी र खनाल कामदार रहेको प्रहरीले जनाएको छ । इलाका प्रहरी कार्यालय पिपरा र जिल्ला प्रहरीको संयुक्त टोलीले आइतबार उनीहरुको गोदाममा छापा मार्दा भारतबाट भन्सार छली चोरी निकासी गरी ल्याएको चिनी र भुजा भेटिएको जिल्ला प्रहरी प्रमुख एसपी नवराज अधिकारीले बताए ।
एसपी अधिकारीका अनुसार जवाहरको गोदामबाट ५० किलोका २८ बोरा चिनी र ५ बोरा भुजा तथा पंकजको गोदामबाट ४६ बोरा चिनी बरामद भएको छ । लोडका लागि प्रयोग गरिएको लु अ.अम ७०९५ नम्बरको आइचर गाडी पनि बरामद गरिएको छ ।
चिनी र भुजा दुई लाख नव्बे हजार बराबरको रहेको प्रहरीले जनाएको छ । उनीहरुलाई आवश्यक कारवाहीका लागि सुठौली भन्सार कार्यालयमा पठाइएको एसपी अधिकारीले जानकारी दिए ।
© न्युज सोसाइटी प्रा.लि.मा सर्वाधिकार सुरक्षित- 2022,
Powered by: Nectar Digit